Prezidente Republika Deklara Estadu Emerjensia Dala 9

Prezidente Republika Francisco Guterres Lú Olo. (Foto: Media PR)

DILI, STLNEWS.co – Prezidente Republika Francisco Guterres Lú Olo, deklara Estadu Emerjensia ba dala sia (9).

Liu husi komunikadu imprensa neebe mak STL asesu husi media PR, Kuarta (30/12/2020) hatete Prezidente Republika, Francisco Guterres Lú Olo, liu husi dekretu prezidensial nu 73/2020, dekreta estensaun estadu emerjensia ba da-9, neebe hahu vigora husi tuku 00.00 OTL, 3 Janeiru too 23:59 OTL loron 1 Fevereiru 2021.

Deklarasaun estadu emerjensia iha teritoriu laran tomak nee, xefe estadu halo bazeia ba proposta husi governu neebe konsidera aumentu numeru kazu konfirmadu Covid-19, hamutuk 13, iha semana ikus fulan nee, hanesan kalamidade publika, situasaun sanitaria iha Indonezia no dezenvolvimentu tipu foun SARS-CoV-2 iha nasaun seluk, inklui iha nasaun vizinu Australia no Singapura. Nunee, nesesariu tebes halao nafatin lalaok prevensaun tuir medidas sira neebe governu estabelese no tuir protokolu saude, hodi evita propagasaun pandemia nee iha rai-laran.

Ho estadu emerjensia nee, sei suspende no limita parsialmente ezersísiu direitu balu, husi ema ka sidadaun sira hanesan iha sirkulasaun internasional, direitu halao reuniaun ka halibur malu no selu seluk tan.

Molok dekreta estadu emerjensia, Prezidente Republika rona uluk Konsellu Estadu no Konsellu Superior Defeza no Seguransa (28/12/2020), neebe apoiu nia iha desizaun ida nee. Tuir mai, xefe estadu husu autorizasaun husi Parlamentu Nasional, neebe ohin (30/12/2020), autoriza Prezidente Republika dekreta estadu emerjensia ba da-sia.

Too tinan nee nia rohan (29/12/2020), tuir dadus husi Ministeriu Saude, total numeru komulativu kazu konfirmadu Covid-19 iha rai-laran hamutuk 44. Kazu sira nee hotu konsidera hanesan kazu importadu no too oras nee, la rejista ema mate tanba corona virus iha Timor-Leste.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here