Prezidente Republika Promulga Alterasaun Dahuluk Lei Resenseamentu Eletoral

DILI, STLNEWS.co – Prezidente Republika Francisco Guterres Lú Olo promulga iha Sesta semana kotuk, alterasaun dahuluk ba Lei Resenseamentu Eleitoral, tanba dekretu foun nee haktuir ona Konstituisaun Republika Demokratika Timor Leste (K-RDTL).

Liu husi komunikadu imprensa Segunda kalan 06/09/2021 hatete, dekretu ida uluk aprovadu iha loron 28 fulan Junu tinan 2021, husi Parlamentu Nasional (PN) no Prezidensia Republika simu iha loron 6 fulan Jullu tinan 2021 iha artigu balun neebe Prezidente Republika konsidera la haktuir Konstituisaun RDTL, tanba razaun nee mak haruka ba Tribunal Rekursu atu tetu no foti desizaun.

Prezidente Republika hato’o pedidu ba Tribunal Rekursu hodi halo fiskalizasaun preventiva ba konstitusionalidade alínea k husi numeru 1 artigu 13 no numeru 2 artigu 17 no numeru 4 artigu 29.

Akordaun Tribunal Rekursu deklara, artigu 17 numeru 2 husi Dekretu Parlamentu Nasionál mak inkonstitusionál, tanba la respeita direitus ema nian neebe previstu iha artigu 38 Konstituisaun RDTL kona-ba fó sai dadus pessoais.

Tanba akordaun husi Tribunal Rekursu mak konsidera artigu 17 numeru 2 inkonstitusionál, mak Prezidente Republika tenke foti desizaun veta dekretu nee, no haruka fila ba Parlamentu Nasional iha loron 9 fulan Agostu tinan 2021 akompaña ho kopia akordaun nian.

Parlamentu Nasional halo fali apresiasaun ba dekretu vetadu husi Prezidente Repúblika no deside hasai tiha artigu 17 numeru 2, no haruka mai Prezidente Repúblika iha loron 31 fulan Agostu tinan 2021. Tamba la iha ona inkonstitusionalidade, Prezidente Repúblika promulga iha loron 3 fulan Setembru tinan 2021, Dekretu Parlamentu Nasionál ho númeru 43/V.

Tuir preambulu hato’o husi Parlamentu Nasional, alterasaun dahuluk ba Lei Resenseamentu Eleitoral halo hodi hadiak sistema resenseamentu eleitoral liu husi teknolojia, no inovasaun neebe loke dalan atu identifika diak liu kada eleitór, ho risku erru neebe kiik tebes.*

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: