Primeiru Ministru Husu Povu Hakmatek

Primeiru Ministru, Taur Matan Ruak husu ba povu atu hakmatek, fo apoiu ba ekipa saude buka tuir moras Covid-19, atu nunee labele hadaet iha rai laran. (Foto: Media PR)

DILI, STLNEWS.co – Primeiru Ministru, Taur Matan Ruak husu ba povu atu hakmatek, fo apoiu ba ekipa saude buka tuir moras Covid-19, atu nunee labele hadaet iha rai laran.

Kestaun nee Xefe Governu hatoo ba jornalista, bainhira remata enkontru ho Prezidente Republika, iha Palasiu Prezidente Nicolau Lobato, Bairru Pite, Dili, Kuarta (17/03/2021).

“Hau informa ba Prezidente Republika katak situasaun agora sei iha ita nia kontrolu, ita seidauk lakon kontrolu ba situasaun, tanba nee hau reforsa mensajen ida sala situasaun hatete no apela ba ita nia sidadaun sira, inan aman sira tuur hakmatek fo apoiu tomak, liu liu ekipa saude buka tuir moras nee, moras daet iha neebe, husi se, oinsa, ita hotu realiza ida nee, “ hatete PM Taur.

Iha enkontru nee mos Primeiru Ministru informa ba Prezidente Republika kona ba assuntu oinsa governu nia espasu atu halo iha tempu oin mai, tenke haree orsamentu suplementare hanesan governu prepara 2021, fokus liu ba rekuperasaun ekonomia.

“Situasaun Covid-19 nee nafatin ou menus ita nia fokus nee ba iha rekordasaun ekonomika, soke infelismente situasaun nee oin seluk,” hatete PM TMR.

Xefe Governu hatutan, iha dalan rua Orsamentu Jeral Estadu muda, ida seluk reforsa orsamentu Covid-19, maibe Ministeriu Finansa agora halo hela iha tempu badak sei aprezenta proposta pasu saida mak Governu presiza halo, para iha osan.

“Reforsa ita nia apoiu makaas ba ita nia grupu sira iha lina frente, ita boot sira haree iha tinan kotuk ita fo apoiu ba ita nia ekipa sira para sira iha ema iha lojistika buat hotu neebe mak sira presiza, kuandu ba iha terrenu laiha problema hodi fasilita sira nia serbisu, ita boot sira haree foin lalais iha sala de situasaun prepara orsamentu ida ba munisipiu rua maibe agora ba tiha munisipiu haat ka lima, ida nee signifika presiza iha reforsu orsamentu para hakbiit sira para bele halo servisu diak liu.” hatete nia.

Taur afirma, asuntu terseiru mak kona ba intervensaun ekonomika neebe mak presiza halo, karik umanitariu presiza halo, no iha tinan kotuk governu iha intervensaun barak mak hanesan ekonomia, sosial, umanitaria.

Fo ona instrusaun ba Ministru Koordenador Assuntu Ekonomiku, Ministru Finansa, Ministeriu Sosial para haree inisiativa, programa saida no pasu saida mak governu presiza halo iha tempu agora, hodi apoiu sidadaun sira ida nee importante tebes.

Nia eplika, asuntu dala haat ou ultimu mak vasinasaun, tanba iha nasaun balun vasinasaun komesa lao ona maibe Timor Leste seidauk. Oras nee governu halo esforsu para bele hetan vasina, nee lafasil tanba vasinasaun nee hadau malu makaas liu iha mundu, hanesan mos iha Timor Leste hadau malu foos, ema nasaun seluk hadau malu vasina, maibe governu sei esforsu makaas atu nunee bele akontese vasina.

Konaba bainhira atu halo vasinasaun, Taur hatete, oras nee kampanha sensebilizasaun hahu ona, kuandu vasina too bele halo ona vasinasaun.

“Ita boot haree kampanha sensebilizasaun Ministeriu Saude nia hahu tiha ona, kuandu vasina too, dala ruma hau seidauk hatene imi jornalista sira hatene uluk ona, tanba nee mak kuandu too naturalmente ita boot sira mak sei fo sai vasina mai ona.” hatete nia*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here