DILI, STLNEWS.co – Tristi ba guarda prizional sira iha prizaun Gleno, tanba lakon sira nia kolega diak ida ho naran Andre Soares neebe fila hikas ona ba Aman Maromak nia kadunan Santo.
“Ami nia Guarda Prizional ofisial Sub Xefi ida naran Andre Saores hakotu iis ohin, mate derepente, tanba sofre tensaun,” dehan Diretor Prizaun Gleno Nito dos Santos iha Ermera ba STL liu husi telefone, Sesta (30/06/2023).
Nia hatutan, matebian halao hela nia servisu, derepente akontese moras kolega sira kontinua lori ba iha hospital Gleno, maibe la konsege salva nia vida, hakotu iis iha oras tuku 9:26.
Nia esplika, matebian orijen mai husi Munisipiu Ermera, hanesan mos guarda antigu neebe primeiru halao nia knaar iha Prizaun Bekora, iha tinan 2017, nia kompete ba iha prizaun Suai liu ba iha guarda sub xefi hamutuk ho diretor iha prizaun Suai, no foin lalais nee matebian rasik mak hatama karta transferensia hodi muda mai iha prizaun Gleno iha fulan Abril nee.
Tuir Nito, matebian sei lori mai iha nia horik fatin Dili, iha Delta Komoro. No hanesan kolega husi matebian senti tristi, tanba lakon kolega diak ida.
“Hanesan diretor no responsavel ida, lori Ministru Justisa nia naran ami lakon rekursu umanu diak ida, tanba estadu kontribui ba matebian konsege remata nia habilitasaun literariu ba iha mestradu iha administrasaun,” dehan nia.
Nia akresenta, laos familia deit mak senti lakon, maibe husi Ministeriu Justisa, Diresaun Servisu Prizional lakon rekursu diak ida, hahu kedan husi tinan 2000 simu knar, matebian sempre dedika aan tomak, hodi halao servisu neebe iha.
Maibe moris la espera, neebe termina husi Nai leten aas ba, tanba nee hanesan kolega senti tristi, maibe tenki ho fuan boot simu realidade moruk nee, hanesan ema sei la ses husi dalan ida nee.
Iha fatin ketak, Akademiku UNTL Mario Martins dehan, hanesan estudante ida senti tristi, tanba lakon ona rekursu umanu ida.
Hanesan estudante hatoo sentidu kondolensia ba familia, tanba lakon ona rekursu umanu ida,” dehan nia.
Akademiku nee dehan, nudar ema la ses husi dalan ida nee, tanba sai hanesan peregrinasaun ikus iha mundu, tanba nee tenki simu realidade.
(ter)
