DILI, STLNEWS.co – Iha vida moris ema nian la ses husi duvidas no husi problema neebe hasoru, dala ruma ema lakon esperansa, maibe keta tauk Jesus sempre hamutuk hodi hatudu dalan.
Tuir Padre Richardo Pasang, SVD, ba STL via telefone Kinta nee (21/04/2022) liu husi nia refleksaun hatete, duvidas ba buat ruma sempre akontese no sai parte ida iha ema nia moris. Duvidas dala ruma mosu wainhira eziji ema atu hola desizaun ou opsaun ruma.
Padre hatete, dala barak ema la satisfeitu, tristi no lakon esperansa tanba razaun oin-oin. Ema neebe sempre hela iha duvidas nia laran, dala ruma ema la senti Maromak nia prezensa iha nia moris. Karik, hanesan Jesus ninia eskolante sira neebe hanoin Nia neebe mate no moris hias nudar espiritu aat, wainhira derepenti mosu iha sira leet, halo sira hakfodak no tauk.
Padre haktuir, ema idak-idak sempre hasoru problema pesoal no mos problema sosial. Wainhira lakon esperansa, tanba problema sira neebe ema hasoru husu Maromak iha neebe? Nusa Maromak la fo tulun mai hau? Maromak ba neebe wainhira hau hetan terus? Liu husi leituras no evangelhu ohin loron, Jesus hakarak hateten katak, Nia mak Maromak neebe moris hias, laos espiritu aat ida neebe mosu. Problema neebe ema hasoru iha parte idak-diak, tebes, tanba bele konhese ema seluk iha sorin-sorin neebe fo tulun.
(eme)
