DILI, STLNEWS.co – Programa IX Governu neebe lokraik nee sei aprezenta ba iha Parlamentu Nasional, importante mak planu no programa sira nee bele responde ba povu nia nesesidade.
Kestaun nee hatoo husi Diretor Fundasaun Mahein, Abel Amaral ba STL iha nia knaar fatin Bairo Grilhos, Tersa nee (11/07/2023).
Nia hatete, durante iha kampanha governu liu husi partidu neebe sira haknaar aan ba promete ona, tanba nee espera bele realiza duni.
Ho programa IX Governu bele halao sira nia programa no promesa neebe mak durante sira halo ba iha eleitores sira.
“Ba FM ita hein ho programa neebe mak IX Governu atu implementa ba iha sidadaun hotu, espera katak bele koresponde tuir buat neebe mak durante nee sira halo no promete ba iha ita nia komunidade sira, ita hein, tanba sira seidauk halao programa, maibe sira nia programa ita monitoriza hamutuk para oinsa governu nia planu nee bele ezekuta no koresponde ho povu nia nesesidade,” dehan nia.
Nia hatutan, tuir informasaun katak iha Tersa lokraik nee governu sei lori programa ba iha Parlamentu Nasional, espera katak programa hotu bele responde ba povu nia nesesidade moris, tanba durante povu hili Partidu CNRT ho PD tanba planu ho programa, tanba nee espera bele realiza duni.
Iha sorin seluk, Justisa Avelino Coelho hatutan, nia labele fo komentariu konaba planu no programa husi IX Governu nia, tanba povu mak hili pPartidu CNRT no PD atu kaer ukun.
Justisa nee dehan, nee sistema demokratiku, partidu neebe mak manan maioria forma governu tenki aprezenta nia programa iha periodu loron 30 tuir artigu 108, no programa nee husi partidu neebe mak manan.
(eme)
