DILI, STLNEWS.co – Timor Leste Press Uniaun (TLPU) ho apoiu husi United Nations Development Programme (UNDP) liu husi projetu Eleisaun Reziliente Covid-19 iha Timor Leste, neebe finansia husi Governu Japaun realiza treinamentu loron tolu ho titulu “Promosaun Transparensia no Inkluzaun iha Eleisaun Parlamentar 2023”.
Treinamentu loron 3 nee halao iha salaun Tower Fatuhada, hahu husi loron 28-30/3/2023.
Treinamentu konaba jornalizmu no eleisaun nee ho objetivu atu asegura katak, jornalista sira sei fahe informasaun neebe
justu no lo-loos durante eleisaun parlamentár tinan 2023, iha momentu sidadaun sira asesu ba informasaun neebe adekuadu hodi halo desizaun neebe informadu ba eleisaun. Inisiativa nee implementa husi TLPU, neebe suporta husi projetu UNDP CORE-TL neebe finansia husi Governu Japaun.
Prezidente Timor Leste Press Union, Candido Alves hatete, treinamentu nee halao bazeia ba matadalan nasional jornalizmu nian ida ho titulu, “Dalan ba Relatoriu Eleitoral ba Jornalista sira no Komunikasaun Sosial” neebe produs husi Konselhu Imprensa Nasional liu husi projetu UNDP CORE-TL, atu hametin prinsipiu sira konaba jornalizmu dame, relatoriu responsavel no politika inkluziva iha eleisaun ba jornalista Timor-oan sira.
“Ami agradese ba Japaun no PNUD, tanba suporta ona treinamentu ba organizasaun jornalista sira. Treinamentu nee fo dalan ba jornalista sira atu dezenvolve sira nia abilidade atu halo relatoriu ba kobertura eleisaun neebe inkluzivu no justu no kontribui atu promove partisipasaun sidadaun sira iha eleisaun. Ami sente onra tebes atu servisu hamutuk ho Japaun no PNUD nuudar parseiru estratejiku hodi apoia dezenvolvimentu media iha Timor-Leste. Ami espera kooperasaun nee sei kontinua hadia kapasidade media nasional sira nian,” dehan Prezidente TLPU, Candido Alves ba jornalista sira iha Salaun Tower, Fatuhada, Dili, Tersa nee (28/03/2023).
Iha fatin hanesan, Embaixador Japaun ba Timor Leste, KIMURA Tetsuya dehan, prazer boot ida ba nia hodi mai hamutuk ho jornalista sira iha seremonia abertura formasaun jurnalizmu no eleitoral nian iha dadersan ida nee.
“Hanesan hau temi dala barak ona, katak hau mai tiha ona iha Timor-Leste iha tinan rua-nulu (20) liu ba, servisu iha eskritoriu ida neebe reprezenta Japaun iha momentu neeba, no agora hau mai fali tan iha nee. Hateke ba kotuk iha tinan rua-nulu liuba, ita bele observa katak dezenvolvimentu espetakular ida iha Timor-Leste maka estabelesimentu demokrasia solidu. Hau kontenti katak Timor-Leste no Japaun fahe valores komun hanesan demokrasia no liberdade de espresaun,”dehan Embaixador KIMURA Tetsuya.
Reprejenta Governu Japaun nee haktuir, iha tinan kotuk, Konsellu Imprensa Nasional kompilla ona matadalan reportajen eleitoral ba jornalista no media sira, iha ambitu programa Covid Reziliente ba Eleisaun iha Timor-Leste (CORE-TL), ho konsultasaun ho PNUD, jornalista sira, Orgaun Jestaun Eleitoral, partidu polítiku sira, no observadores eleitorais sira, no seluk tan ho susesu.
Embaixador Japaun nee afirma, orgulhu hodi sai nudar fornesedor fundu ba programa ida nee hamutuk ho Governu Timor-Leste no PNUD.
“Programa nee implementadu ona husi ami nia parseiru konfiadu, PNUD, no ita tama ona iha faze final husi projetu nee, ho ansiozu hein konkluzaun konstrusaun no renovasaun eskritorius CNE no STAE nian. Hau hakarak aumenta katak, maski projetu nee konsidera hetan impaktu husi Covid-19 ba eleisaun nian, maibe rekursus sira neebe hetan liu husi projetu nee hanesan eskritorius hirak neebe hau foin temi, no mós matadalan hirak neebe kompilla ona iha tinan kotuk bele uza no aplika ba eleisaun barak iha futuru,” nia katak.
Embaixador Japaun nee komenta, eleisaun neebe livre, justu, no aberta bazeia ba informasaun koretu mak sai aliserse ba demokrasia.
(cri)
