DILI, STLNEWS.co – Organizasaun Persaudaraan Setia Hati Terate (PSHT) bolu atensaun ba membru tomak iha teritoriu nasional atu asegura prosesu kampanha eleisaun parlamentar no apuramentu too formasaun governu.
Kestaun nee hatoo husi Prezidente PSHT Baltazar Lemos Seixas ba jornlista sira iha nia knaar fatin Komoro, Dili, Sesta nee (14/04/2023).
Nia dehan, estrutura PSHT iha seksaun disiplinar, sei tau matan ba membru sira neebe kontra regras seguransa no perturba ordem publiku, nunee haburas pas ba dezenvolvimentu nasional iha rai doben ida nee.
“Ita fo sai ona katak, durante kampanha ka tama eleisaun parlamentar, ema se deit labele halo barulhu. Ita mak seguransa ba ita nia nasaun, ba ita nia aan, seguransa ba família, seguransa ba se deit,” nia tenik.
Nia espika, kuandu elementu ruma halo problema, uza atributu organizasaun, iha ona ekipa atu atende, sei kuandu atende labele ona, estrutura nasional sei halo koordenasaun ho PNTL hodi bele responde hamutuk.
Nia esplika, kuandu membru PSHT identífika sira nia ema uza duni atributu, sira sei foti prosesu ba sira.
“Primeiru ita fo Xamada atensaun, maibe kuandu nia kontinua, ita fo sansaun ba sira, sei la ativu iha organizasaun minimu tinan rua no masimu tinan lima”, nia deklara.
Nia hatutan, relasiona ho membru balun neebe halo afiliasaun ba partidu sira, Prezidente PSHT dehan, ema individu iha direitu atu hili partidu tuir nia konsiensia, maibe bandu total kuandu ba ho organizasaun nia naran nee labele, tanba estatutu organizasaun la hakerek.
Iha fatin ketak, Prezidente Komisaun Reguladora Arte Marsiais (KRAM), Fernando Antonio da Costa “Lakinawa” dehan, sira halo ona serimonia simbolikamente ida, oinsa mak bele garante atu labele akontese tan violensia sira neebe mak involve husi organizasaun arte marsiais.
Nia esplika, agora organizasaun hotu-hotu, iha sira nia kondisaun idak-idak nian, balun tuan liu, balun foun, neste momentu ida foun liu nee mak tolu nee, tanba ita foin loke iha 2020, agora foin halo tinan tolu. Tanba nee, sira kontinua halao servisu hamutuk.
“Signifika, atu garante katak, dehan ida nee sei kontribui, sim sei kontribui dunik, tanba ita mos ntau oinsa, sira bele jere sira nia membru ho diak liutan,” katak nia.
Nia informa, sira mos hakarak atu membru sira tenke rejistu nunee, sira mos bele halo kontrolasaun ba sira iha neebe deit, ou involve iha problema ruma karik, nunee sira bele hatene.
Nunee mos, akademista UNTL Jose da Silva esplika, Arte Marsiais sira tenke fo kontribui paz no hakmatek iha sosidade nia leet wainhira tempu kapana nomos eleisaun, povu periza hakmatek hodi tuir kampanha no tuir eleisaun.
(jen)
