DILI, STLNEWS.co – Governu iha hanoin atu reativa fali membru Polisia Nasional Timor Leste (PNTL) nain 158 neebe antes nee reforma ona, presiza haree no tetu didiak.
Lia hirak nee hatoo husi Peskizador AJAR, Inocencio de Jesus Xavier ba STL iha nia knaar fatin Farol, Tersa nee (19/09/2023).
Nia hatete, maski sira mos simu keixa husi membru PNTL neebe mak reforma ona, maibe antes reativa presiza haree didiak, se bele kria kondisaun ba sira, tanba sira servisu kleur ona.
“Atu ativu fali polísia neebe mak reforma ona presiza haree didiak, tanba ami mos simu keixa husi PNTL reformadu nain 158 neebe sira koalia konaba kestaun reforma ida nee inkondisional, katak sira simu atu reforma, maibe presiza kria kondisaun ruma, tanba sira servisu kleur ona, no Komando PNTL labele kaer deit lei reforma nee ba duni deit sira, satan sira reforma ida ho dignidade, se sira fila fali ba ativu, ida nee mak ita tetu nia risku,” katak nia.
Tuir Inocencio katak, bainhira ativu fali ba halo saida, tuir nia hanoin Ministeriu Interior buka solusaun ida, haree tuir se sira reforma karik ho diak no dignu.
Nunee mos Diretor Ezekutivu Hak, Feliciano da Costa Aroujo hatutan, atu reativa fila fali membru PNTL, governu liu husi Ministeriu Interior ho PNTL presiza tuur hamutuk hodi tetu antes reforma ba iha membru PNTL neebe mak reforma ona, nunee labele mosu intendimentu ba malu.
“Presiza tetu buat hotu antes reativa fali membru Polisia Nasional Timor Leste nain 158,” katak nia.
(eme)
