Rede Ba Rai Hatama Keixa Ba PGR

Organizasaun Rede ba Rai hamutuk ho komunidade uma kain 11, iha suku Caicoli hatama karta keixa ba iha Prokurador Geral Republika (PGR), hodi kontra Manuel Carceres atual Ministru Justisa, Fransisco R.B Guterres (Diretor Diresaun Nasional Terras i Propriedade) nomos Faustino da Costa atual Komisariu PNTL, neebe iha planu atu hasai komunidade sira hodi hari edifisiu Polisia Nasional Timor Leste, maibe laiha konkordansia neebe justu. (Foto: STL/Donaciano Magalhães)

DILI, STLNEWS.co – Organizasaun Rede ba Rai hamutuk ho komunidade uma kain 11, iha suku Caicoli hatama karta keixa ba iha Prokurador Geral Republika (PGR), hodi kontra Manuel Carceres atual Ministru Justisa, Fransisco R.B Guterres (Diretor Diresaun Nasional Terras i Propriedade) nomos Faustino da Costa atual Komisariu PNTL, neebe iha planu atu hasai komunidade sira hodi hari edifisiu Polisia Nasional Timor Leste, maibe laiha konkordansia neebe justu.

Tuir Koordenador Nasional Rede ba Rai, Pedrito Vieira katak, Rede ba Rai neebe maka halo advokasia konaba rai, akompana komunidade uma kain 11 afetadu neebe maka iha planu husi governu atu halo alargamentu edifisiu PNTL, tanba nee sira halo ona meiu oioin, hodi konta tanba komunidade sente katak sei hasai sira laho justu.

“Ohin loron iha momentu neebe diak ami bele hasoru Adjuntu Prokurador Jeral hodi hatoo komunidade sira nia preokupasaun neebe dadaun nee sira infrenta, konaba alargamentu atu hari edifisu PNTL,”dehan nia ba jornalista, bainhira remata hasoru malu ho Adjuntu PGR, iha edifisiu PGR Colmera, Tersa (23/02/2021).

Nia dehan, komunidade sira mos hatoo ona sira nia preokupasaun pisikolojikamente sira sente tauk, tanba iha notifikasaun husi Ministeriu Justisa no mos linguajen ultimatu husi Komisariu Polisia Nasional Timor-Leste katak fo loron 10 deit komunidade tenki sai husi sira nia hela fatin, tanba atu ezekuta ona planu hari edifisiu PNTL nian, tanba nee maka komunidade sira ho laran tauk.

Nia haktuir, iha hasoru malu nee adjuntu mos konsidera komunidade sira nia preokupasaun, katak dalan maka ida nee duni atu iha instituisaun se deit maka iha Timor buat hotu iha lei nia okos, tanba nee adjuntu mos koalia katak estadu nee laos politika panglima ba asuntu lei, maibe lei maka iha leten.

Tanba nee sira ezije keixa nee hatama ba Ministru Justisa neebe maka hasai notifikasaun ba komunidade sira, no keixa ba Diretor Diresaun Nasional Terras i propriedade, no Komisariu Polisia Nasional Timor-Leste, tanba komunide sente katak ida nee sira halo asaun ida neebe maka ilegal no lakonsidera sidadaun neebe maka hakarak moris iha justisa nia laran.

Tuir prosesu neebe maka sira akompana hela katak, prosesu neebe lao dadaun nee latuir prosesu administrasaun indimizasaun, tanba sira mai dehan deit katak povu tenki sai ona husi nee.

Iha 2013 ate agora sira halo komunikasaun ba malu, maibe too agora seidauk iha konkordansia tanba tuir prosedimentu katak bainhira estadu ida atu hasai komunidade ruma husi nia hela fatin, prediza iha konkordansia neebe maka tenki asina no tenki legal.

“Se bainhira husi parte governu nian mai dehan katak haruka komunidade loke ona rekening depois haruka osan mai, maibe wainhira laiha konkordansia, lahatene parte governu atu haruka osan hira, tanba ida nee dalan neebe laduun los,” dehan nia.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here