Refleksaun: Husik Tinan 2020, No Simu Tinan Foun 2020 (Pe. Richardo Pasang, SVD)

Padre Richardo Pasang, SVD. (Foto: STL/Emerenciana Pinto)

REFLEKSAUN: HUSIK TINAN 2020
NO SIMU TINAN FOUN 2021
(Pe. Richardo Pasang, SVD)

DILI, STLNEWS.co – Adigium Latina hateten, ”Tempora mutantur et nos mutamur in illis”; sentido katak “O tempo está correndo e nós mudamos nele”! (tempo lao daudaun no mudansa hamutuk ho nia). Moris ne’e hanesan peregrina liu husi tempo ba tempo, husi secuensia ba secuensia, husi minute ba minute, husi oras ba oras, husi loron ba loron, husi fulan ba fulan no husi tinan ba tinan.

Maibe, valor ou sentidu saida nebe ita apriende husi akotesimento susar no terus?? Apriende husi Aristoteles,’importante tebes atu ita hakmatek uitoan ‘fazer uma pausa’ hodi buka hatene klean sentidu husi akotesimento ida’!

Tinan 2020 sei liu daudaun e ita hotu prepara hela atu tama no simu tinan foun 2021. Kuitadu, sekuandu ita la valoriza tempo agora nebe sei liu, sei sai tempo nebe liu maibe laiha sentidu/signifikadu (o tempo passa sem sentidu). Ema ida-idak persija bravura/coragem pessoal atu faser uma pausa (para uitoan), valoriza no continua lao nafatin ba oin. Filosof Aristoteles hare’e ida ne’e hanesan refleksaun hodi dehan,” Moris ne’ebe la mai husi refleksaun mak moris nebe inaproriadu atu hamoris. (Uma vida que não se reflete é uma vida que não deve ser vivida!).

Ba ita nia nasaun ida ne’e, no mos nasaun seluk iha mundo raiklaran, tinan 2020 bele remata ho arrepende ou halerik tamba buat hotu la realiza tuir ita nia planu. Pandemia covid-19 harahun planu barak iha ita nia moris nu’udar nasaun, insitituisaun, Igreja, familia no mos nu’udar pessoal. Ema hotu espera katak iha situasaun difisil, ita hakarak atu liu lalais situasaun ida ne’e atu bele hein ho esperansa moris ho akotesimento foun. Maibe, iha ka lae sentidu husi akotesimento terus no sofremento nebe ita esperienta??? Apriende husi Aristoteles katak mai ita para uitoan, fazer uma pausa atu bele buka sentidu husi sofremento nebe iha. Ba ita nia nasaun, ita sei reflete kona ba pontu rua importante mak kona ba sentimento solidaridade no aten brani hola desisaun nebe sem populis (desisaun nebe la satisfas ba ema hotu).

Solidaridade:
Sentimento solidaridade tane aas iha palku tinan 2020. Pandemia covid-19, hatur ema iha akotesimento “o mesmo destino” (senasib-sepenanggungan). Maibe, laos ema hotu iha nia papel hanesan atu bele simu terus ne’e. Personalia importante iha ‘o mesmo destino’ mak personalia saude sira; iha nivel saida deit. Se ita husu katak imi hakarak bele kona daet ho moras ida ne’e; sira nia resposta mak ‘Lae” no lakohi. Maibe, e nome profesionalismo iha knaar; sira tenke hala’o. hatais ropa covid-19, pronto atu daet, distansia ho familia no karik stress iha tempo ne’e nia laran. Iha nasaun seluk ita rona katak medico sira (doutor, imframeagem,) mate tamba daet virus corona, covid-19. Ita apresia tebes ba medico sira katak sira bele hola parte, la tauk hodi servisu atu prevene no mos halakon moras ida ne’e. Iha sira nia-an, ita bele hare’e sira nia ‘sentimento solidaridade’! Los duni iha cantico ida husi Eka Gustiwana dehan katak medico sira servisu ba ‘klamar seluk’. Ita atu dehan saida ba servisu ida ne’e se laos “palku solidaridade’??

‘Palku solidaridade’ seluk nebe ita bele hare’e: nasaun seluk hatudu solidaridade ba nasaun seluk, organisasaun sira hotu hatudu sira nia solidaridade hodi halibur ajuda ruma ba ema nebe persija. Nasaun Timor Leste foti desisaun atu fo apoio ba povo sira husi primeiro basikas ate sexta basikas nebe simu ho sasan deit. Iha nasaun seluk, labarik sira halo atividades ruma nebe halibur osan atu bele ajuda ema seluk iha situasaun pandemia ida ne’e. Iha Makasar Indonesia, labarik sira halibur sira nia osan celengan atu fo medico sira hodi dehan,”ne’e ba doutor sira atu bele sosa masker, ne’e mai husi ami nia tabungan, celengan durante fulan ne’en”. Kongregasaun religioso/a mos hatudu sira nia solidaridade hodi fahe masker ba povo sira no ajuda caridade ba ema kbiit laek sira. Grupu kategorias sira mos hatudu solidaridade iha tempo pandemia ida ne’e, badinas hodi fahe ajudas caridade ba kbiit laek sira. Partidos politika mos hatudu sira nia aksaun solidaridade ba povo kbiit laek sira iha Timor laran tomak iha tempo pandemia nia laran. Karik sei iha ema ruma, pesoalmente hatudu sira nia solidaridade ba ema seluk iha tempo difisil ne’e nia laran, ita apresia teb-tebes katak ita sai ‘loadspeaker’ husi ita nia konsensia pessoal bele hatudu solidaridade ba ema seluk. Buat hotu nebe ita halo iha tempo pandemia nia laran hodi hatudu katak ita nia nasaun mos apriende ba cultura solidaridade no hadomi malu nebe laiha fronteira, hatudu cultura ‘sentimento solidaridade’ o mesmo destino.

Desisaun nebe sem populis: (la fo satisfas ba ema hotu).
Situasaun pandemia covid-19 hanorin ita kona ba moris iha situasaun incerteza (ketidakpastian). Moras ida ne’e uniku tanba ema balun hetan moras ida ne’e klaru ho ninia sintoma maibe balun hetan moras ida ne’e la klaru nia sintoma saida, ne’e duni ema la detekta nia daet moras ne’e ka lae. Tamba ne’e, desisaun ruma mos ita hola ho ‘presunção de culpa” (ema hotu bele deit kona virus ida ne’e). Ne’e duni, Estado Timor Leste hola desisaun katak ema hotu; Timor oan ou estrangeiro nebe tama iha Timor Leste tenke tuir protocol saude nian: ema hotu tenke karantina semana rua nia laran, obrigatorio tuir teste swab, uza masker, fase liman bebeik, uza sanitizer, bandu ba atividades sira nebe halibur ema barak inklui mos selebrasaun eukaristia iha Igreja. Klaru katak desisaun sira ne’e la fo satisfas ba ema hotu. Ema balun la dun gosta maibe desisaun ne’e ba ema hotu ba inklui mos ema sira nebe la moras. Maibe, nasaun tenke hola desisaun nebe sem populis ba “bonum commune” (diak ema barak).

Loron rua antes remata tinan 2020, povo Timor Leste hetan tan desisaun sem populis husi Estado Timor Leste considera ho covid-19 nebe agora daudaun daet ba ema nain sanulu resin tolu (13) katak bandu ba atividades nebe halibur ema barak hodi prevene moras ida ne’e. Igreja mos simu desisaun ida ne’e no apoio hodi avisu ba sarani tomak Timor Leste katak laiha partisipasaun sarani iha Misa dia 31 de Desembro hodi remata tinan 2020 no mos Misa abertura ba tinan foun 2021. Los duni katak ema barak la dun satisfas ho desisaun ne’e maibe ba “bonum commune” (diak ema barak) ita tenke halo tuir.

Ita nia nasaun no mos Igreja apriende nafatin atu hola desisaun nebe la satisfas ba ema barak maibe diak ba ema barak. Ema matenek dehan,”Desisaun nebe diak dala ruma la fo satisfas ba ema hotu”! Maibe, ita apriende hakat liu ‘tendensias populis’ nebe hakarak fo satisfas ba ema hotu. Situasaun no desisaun nebe ita esperienta atu eduka ita povo sira atu labele ‘mimado’ (manya) maibe eduka ita atu sai ema ida maduru hodi hasoru situasaun difisil no mos hola desisaun diak.

Bem Vindo Ano Novo 2021:
Apriende husi situasaun rua iha tinan 2020, sente katak la todan atu husik tinan 2020. Espera katak ita hotu apriende barak husi situasaun 2020. Ita hateke ba tinan foun hodi aranja stratergia foun atu bele atinji planu sira nebe ita hakarak implementa. Tempo lao daudaun, ita mos apriende atu halo transformasaun. Troka tinan sai oportunidade atu valorize ita nia moris nebe ita hala’o. Parabens ba ita hotu nebe sei finalize tempo ida hodi hahu tinan foun, periodo foun iha ita nia moris. Ita la bele moris nafatin iha situasaun triste nia laran, tempo atu ita apriende hodi sai husi situasaun ida ne’e ho prinsipio “Loron ida ne’e diak liu husi loron horseik”, ‘Loron aban diak liu husi loron ohin”!

FELIZ ANO NOVO 2021: Parabens ba ita hotu. Mai ita hasa’e agradesemento ba Maromak ba moris no apriende husi peregrinasaun moris nebe liu daudaun iha tinan 2020. Espera katak Tinan 2020 laos deit sai tinan nebe nakonu ho desastre maibe nakonu mos ho “valor boot” iha akotesimento nebe ita hasoru.

FELIZ ANO NOVO 2021 BA IMI NIA FAMILIA SIRA HOTU!
MAROMAK HELA HO ITA!

Batugede, 31 de Desembro 2020
Pe. Richardo Pasang, SVD
(Direitor Uma Formasaun SVD Batugede)

LEAVE A REPLY

Please enter your comment!
Please enter your name here