Regra Lockdown, Governu Presiza Fo Subsidiu Ba Komunidade

Program Officer ASIA Justice and Rights (AJAR), Inocencio Xavier. (Foto: STL/Santina Castro)

DILI, STLNEWS.co – Bainhira Governu hasai Rejulusaun do Governu tenke iha mos planu nunee bele fo subsisidu ba komunidade sira, nunee bele hakmatek iha uma hodi taka total atividade.

Kestaun nee hatoo husi officer Asia Justice and Right (AJAR), Inocencio Xavier ba STL liu husi telefone, Sesta (12/03/2021), katak governu hakarak lockdown nee tenke kria mos kondisaun ou fo subsidiu no labele halimar fali ho lockdown hanesan ema kontinua ba merkadu loja sira.

“Ami hanoin tuir Rejulusaun do Governu nee dehan merkadu/loja sira kontinua loke, ba hospital ba pulsa nee kontinua, maibe tuir loloos tenke iha kondisaun, agora sei ita hakarak lockdown tenke lockdown total, hau haree lockdown nee ita lockdown halimar fali, sei tuir loloos ita nia lockdown governu tenke prepara atu fo subsidi ba ema, atu ema hela hakmatek iha uma. Labele sira dehan lockdown maibe merkadu sei loke, tanba merkadu nee laos ema ida rua, nee ema barak, presiza tebes governu nia intervensaun. Lockdown ida nee hanesan ita lockdown halimar fali.” nia informa.

Nia husu sei guvernu dehan loron hitu (7) labele halo atividade no konfinamentu obrigatoriu, entaun governu mos prepara kondisaun ruma tanba kuaze atu tinan ida resin ona, tanba ho situasaun sira hanesan nee governu antes nee iha ona orsamentu aprova iha Parlamentu Nasional no promulga ona husi Prezidente da Republika.

“Sei ita dehan durante loron hitu lahalo atividade, konfinamentu obrigatoriu ema labele sai ba liur, sei ema labele sai liur, governu tenke fo kondisoens, nee deit sei ita dehan konfinamentu obrigatoriu transmisaun lokal mas merkadu nee ita la hatene ema bara-barak nee ba hotu konsentra iha neeba ba hola sasan ba faan sasan, pois ita dehan nusa so governu mak haree ida nee liu liu iha merkadu loja sira, ami hanoin ida nee importante ba ita tanba tinan ida resin ona governu presiza iha kondisaun labele ho situasaun ida hanesan nee, tanba nee mak ema barak fiar lafiar nee. Iha situasaun sira hanesan nee, tuir loloos iha ona orsamentu antes oinsa prepara kondisaun tanba orsamentu aprova tiha ona.” nia hatete.

Iha biban nee Inocencio Xavier kestiona fasilidade neebe maka uza hodi test swab, neebe maka uza iha kuarentena Tasi-tolu katak ema nain sanulu resin uja mangeira ida deit mak halo teste.

“So ke buat ida neebe mak hau hetan husi traballador balun servisu iha kuarentena, sira prepara kuarentena ba ema sira kuandu test swab nee sira uza mangeira ida deit tuir informasaun neebe maka hau hetan. Sidadaun joven ida sira uza mangeira ida deit mak koko ema nain sanulu resin neen (16), sei Covid-19 nee akontese ema ruma bele afeita fali ba ema seluk entaun entre ema nain ida too numeru lima maka hetan numeru neen ba kotuk nee bele kona tanba hadaet ona husi mangeira ida swab nee.” hatete Inocencio.

Tuir officer AJAR, hatete traballador ida neebe maka horseik teste swab nee mak informasaun nee ba nia, tanba nee mak parte AJAR lamenta ho fasilidade neebe limitadu iha kuarentena Tasi-tolu, tanba ho fasilidade nee mos bele halo transmisaun moras husi ema ida ba fali ema seluk.

“Tuir traballador nee mak hatete, hau hanoin ida nee maka fo perigu tebes buat saida mak hau hetan direita husi kolega traballador neebe mak horisehik halo ona test swab ba sira neebe maka servisu iha kuarentena, ami hanoin ida nee presiza haree didiak, tanba ami lamenta mangeira ida iha ba ema nain sanulu resin neen, lojika ka lae? sei ema nee antes iha infeksaun ruma tuberkolojia ou iha moras aat hadaet ruma konserteza nia mos halo ona transmisaun ba moras seluk ba ema seluk neebe maka mezmu ke antes nee nia laiha moras.” hatete nia.

Tanba nee nia dehan ho fasilidade saude nian neebe maka limite, entaun nia hanoin orsamentu Covid-19 iha tanbasa mak la sosa buat sira nee.

Tuir informasaun neebe maka nia simu mangeira ida neebe tuu ba ema sira neebe maka halao hela teste swab iha kuarentena Tasi-tolu no informasaun nee nia simu direita husi pesoal neebe maka simu teste swab.

Nunee mos Koordenador Forum Da Pas, Alves Martins Santos, husu mos ba komunidade hotu atu kumpri regra neebe mak governu hatun, nunee hodi luta kontra moras Covid-19 mai iha rai laran.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here