Rekezitu Bomba Rai; SEFOPE Laiha Kapasidade Diskute Ho Australia

Diretor Ezekutivu FONGTIL, Daniel Carmo do Santos. (Foto: STL/Santina Castro)

DILI, STLNEWS.co – Sosiedade Sivil iha rai laran konsidera Sekretariu Estadu Formasaun Professional no Empregu (SEFOPE), laiha kapasidade atu diskute ho Australia, kona ba rekezitu bomba rai, neebe aplika ba juventude Timoroan sira neebe hakarak ba servisu kuu aifuan iha neeba (Australia-red).

Diretor Ezekutivu FONGTIL, Daniel Carmo do Santos hatete, rekezitu neebe aplika ba juventude sira, nee mai husi Australia, maibe nee hatudu inkapasidade Sekretariu Estadu nian, inkapasidade adidu traballu Timor Leste nian iha Australia no inkapasidade Embaixador Timor Leste nian iha Australia.

“Ami hatete hanesan nee, tanba ema aplika ema nia regras, maibe ita laiha kapasidade atu diskute ho ema kona ba regras hirak nee no regras nee bele duni kalae atu aplika, entaun sira ba hanesan diak deit, dehan ema nia regras ona, sira tolan tomak deit lakohi diskute ho ema,” dehan nia ba STL, iha nia knaar fatin FONGTIL, Caicoli, Dili, Kuarta (23/09/2020).

Timor Leste tuir Daniel katak, nasaun soberania ona, tanba nee se wainhira hanesan nasaun soberania ida tenke uza poder governante nian hodi bele diskute, wainhira hakarak halo kooperasaun, maibe regras nee ba Timor Leste lamerese.

“Tenke buka meius uza regras seluk husi nee, se lakohi tenke deskuti reprezenta nasaun nian, maibe dalaruma sira ba hanesan nonok deit, hanoin katak ema fo ona oportunidade regras maka hanesan nee ona, ita tenke tuir mais nee lalos buat hotu tenke diskute,” Daniel esplika.

Nia hatutan ema uza Timor Leste nia rekursu no forsa ba dezenvolve ema nia ekonomia, joven sira manan simu vensimentu, maibe lolos nee estadu tenke lori Timor nia naran juventude sira nia fatin, atu debate kona ba rekezitus hirak nee.

Tanba nia dehan ba Timoroan rekezitus sira hanesan nee lamerese, maibe instituisaun estadu relevante hanesan SEFOPE ninia inkapasidade labrani atu diskute ho ema kona ba regras hirak bele duni ka lae, atu aplika ba Timoroan.

“Sira ba tolan tomak deit, halo juventude sira lakon vontade atu kompete, maibe servisu kuu aifuan deit tenke kria regras neebe lamerese atu aplika, ita hanoin katak ida nee ladun diak,” nia argumenta.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here