Rekrutamentu F-FDTL 600 Komesa Marsu

Rekrutamentu ba membru Falintil Forsa Defeza Timor Leste (F-FDTL) sei komesa iha fulan Marsu tinan 2021. (Foto: Media PR)

DILI, STLNEWS.co – Rekrutamentu ba membru Falintil Forsa Defeza Timor Leste (F-FDTL) sei komesa iha fulan Marsu tinan 2021.

Kestaun nee hatoo husi Xefe Estadu Maior FALINTIL Forsa Defeza Timor Leste (F-FDTL) Maijor Jeneral Lere Anan Timur ba jornalista bainhira remata hasoru malu ho Prezidente Republika Francisco Guterres Lú Olo iha Palasiu Prezidente, Bairru Pite, Kuarta (06/01/2021).

“Kona-ba rekrutamentu tinan ida nee nia laran sasan sira lao hotu diak sei bele hahu iha Marsu, hahu ho 600 depois maka segundu rekretamentu ba fali 200 maibe depende situasaun Covid-19 ida nee, orsamentu iha tiha ona,” hatete Major Lere.

Komandante F-FDTL dehan agora komandu tenke kria kondisaun ba simu rekrutamentu ka kandidatu foun atu ba halo rekrutamentu.

Nunee mos kona-ba montante orsamentu hira maka preve iha rekrutamentu nee Lere dehan orsamentu hira nee la hatene maibe orsamentu iha ona bainhira la too maka sei husu tan ba Ministru maibe orsamentu iha tiha ona.

“Dokumentu sira nee nafatin, laos halo foun, dokumentu sira tinan uluk impase polítika, Covid-19 ida nee maka haree fali, balun uluk hatama iha tinan 25 tinan rua, tinan 28 nee labele ona neebe pasiensia tanba tinan liu ona, maibe ida neebe uluk tinan 18-20 sei bele entaun simu maka ida nee.” Katak nia.

Major Lere hatutan agora governu maka tenke buka servisu fo ba joven sira, se lae bele dehan joven sira nee sai marjinalizadu dala rua, marjinalizadu iha nia rain propriu, marjinalizadu ba ema nia rain.

Komandante nee hatutan hanesan joven sira neebe servisu iha ema nia rain neeba nee, kuitadu tanba deit servisu laiha nee maka ba iha neeba, agora ba neeba marjinalizadu tan, maibe sira erois ba dezenvolvimentu nasaun ninian, sira haruka osan mai, foin daudauk rona informasaun katak sira nain atus ida resin sai husi nia kompana nee problema ida neebe dezafiu sira nia situasaun, agora governu tenke resolve.

Lere hatutan nia mos la fiar katak sira neebe ba Australia, Korea nee moris hanesan Australiano moris mudansa ka laiha, sira nia moris la hanesan maibe sira sakrifika sira nia aan.

“Hau bolu sira mos eroi ba dezenvolvimentu, sira nia osan hira maka la tama fula-fulan, loro-loron, tinan-tinan tama iha Timor, hau lao kuaze nasaun laran hau haree uma didiak deit, uma ida neebe luxu afinal sira maka halo,” katak nia.

Reportajen: Emerenciana Pinto
Editor: Ekipa STL

1 COMMENT

LEAVE A REPLY

Please enter your comment!
Please enter your name here