DILI, STLNEWS.co – Prezidente Komunidade Musulmanu Timor Leste (TL), Pascoal Siddiq Lemorai deklara ba publiku, iha ambitu selebrasaun loron Idul Adha iha Mesjid Anur katak, relijiaun Musulmanu TL la fasilita terorista hodi estraga rai Timor.
“Hau nudar Prezidente Komunidade Musulmanu TL, atu deklara ba publiku relasiona ho informasaun neebe espalha iha publiku katak, ami komunidade Musulmanu iha TL fasilita terorista husi nasaun Pakistaun hamutuk ema nain 8 mai Timor, informasaun nee laloos, tanba ami nia maluk relijiaun Musulmanu nain 8 husi Pakistaun mai Timor, tanba atu haklaken doutrina Relijiaun Musulmanu iha TL, sira laos terorista,” dehan Pascoal Siddiq Lemorai iha Mesjid Anur, Kampung Alor, Kinta (29/6/2023).
Nia lamenta katak, maluk Pakistaun nain 8 nee mai husi odamatan fronteira nasaun Indonezia-TL, depois too Timor, hetan filmajen neebe publika iha media balun dehan katak sira nee terorista.
“Iha momentu neeba kedan, husi ita nia parte seguransa liu husi servisu intelijensia mai husu ami, iha momentu neeba kedas ami hatete katak, ami sedauk hatene, tanba sidadaun Musulmanu nain 8 nee sei iha dalan mai Dili no bainhira sira tama mai iha Markoni, hau rekonhese katak bainaka husi komunidade Musulmanu TL, atu habelar diak liu tan informasaun ba maluk Musulmanu sira iha area rurais sira, ezemplu hafoin sira mai too iha Dili loron ida deit, ba vizita maluk Musulmanu sira iha Munisipiu Same, iha neeba partisipa husi Administrador Same, Polisia nomos komunidade Musulmanu sira neebe mak hela besik iha neeba,” dehan nia.
Nia haktuir tan katak, maluk Musulmanu sira neebe mak TL hamutuk ema nian 8, horseik sira ba vizita maluk musulmanu sira iha Munisipiu Likisa, halo ritual Relijiaun Musulmanu nian, dia 1 de Julhu sei ba fali iha Munisipiu Lospalos, depois mai vizita maluk musulmanu sira iha Baucau, kontinua ba iha Viqueque hodi halao serimonia boot ida iha neeba, kona ba Jamah iha Viqueque-Uato Lari iha dia 8, 9 de Julhu iha neeba, depois dia 11 ou 13 de Julhu sira sei fila ba sira nia rain Pakistaun liu husi Indonezia,” dehan nia.
“Hau atu deklara tan ba publiku katak, antes maluk Pakistaun nain 8 nee antes vizita maluk Musulmanu iha TL, hau rasik lori sira nain rua, reprezenta sira nain 8 nee, ami ba vizita hodi hatoo sentidu kondolensia nudar komunidade Musulmanu TL ba matebian, Primeiru Ministru nia espoza iha ninia rezidensia Metiaut, neebe polemika neebe maka durante nee iha, portaun tama mai TL nee ida deit, see mak fasilita, Governu liu-liu serbisu imigrasaun, sei karik sira iha problema kona ba terorista nee, iha fronteira labele autoriza sira tama TL. Hau atu esplika deit katak, sidadaun Pakistaun nain 8 nee, sira laos terorista, sira mai habelar dutrina Musulmanu ba maluk Timor oan musulmanu iha TL, sira mai iha nee mos ami rasik mak akompanhia sira, kuandu iha buat ruma, ami sempre hatene,” deklara Prezidente Musulmanu TL, Pascoal.
Responde perguntas Jornalista STL ba maluk Musulmanu nain 8 husi Pakistaun Prezidente Musulmanu TL iha kunhesimentu katak, antes sira mai TL, iha ona kunhesimentu husi maluk musulmanu balun.
“Hau hanoin, ida nee erro ida tanba sira mai TL fasilita husi maluk musulmanu balun, hau nudar prezidente Musulmanu TL, hau la hatene duni informasaun nee, tanba ema maka fasilita, laos komunidade Musulmanu TL maka fasilita, maibe kuandu sira mai ona, hau konsidera sira hanesan bainaka husi komunidade Musulmanu TL, hau tenke hasoru sira no husu sira nia objetivu mai halo saida iha TL, depois hau produs gia ida, hau halo surat jalan ba sira husi Prezidente Musulmanu TL hodi hatudu ba Xefe Suku no Xefe Aldeia sira bainhira sira ba vizita fatin neebe sira ba vizita nee,” dehan nia.
Iha oportunidade nee, Aftab Alam neebe akompanhia ho nia maluk Irfan Ullan iha Mesjid Anur kampung Alor konfesa katak, sira nudar komunidade Musulmanu Pakistaun mai TL hodi habela doutrina Islamia ba maluk Musulmanu sira iha TL.
“Ami husi Nasaun Pakistaun nain 8 mai Vizita TL ho objetivu atu habelar doutrina islamia ba ema Musulmanu neebe eziste iha TL tomak hamutuk 23.000 ital, misaun ida nee maka profeta hotu-hotu halo, inklui Musulmanu. Ami kontente bele hasoru maluk Musulmanu sira iha nee, povu nasaun TL simu ami ho diak, ami haree komunidade TL simu ami ho diak, tanba nee ami hatoo agradesimentu ho laran luak tebes ba Governu TL ho povu tomak,” dehan Altab Alam.
Iha sira nia vizita mai TL, hahu vizita uluk maluk Musulmanu sira iha Markoni, kontinua ba masjid Anur, kontinua kedan ba vizita maluk musulmanu sira iha Bairopite, nunee kontinua ba Same, Lospalos, Baukau, Vikeke no remata husi nee ba vizita maluk Musulmanu sira iha Indonezia no fila fali ba Pakistaun.
(jos/joa)
