RENETIL: Dezde Ukun Aan Problema Saude Nafatin Sai Kestaun Publiku

DILI, STLNEWS.co – Dezde ukun aan, problema ida iha Timor Leste neebe sempre bolu publiku nia atensaun mak problema iha sistema saude.

“Ida nee laos deit tanba insidensia moras barak no kuaze familia hotu-hotu iha esperiensia ruma ho servisu saude iha Timor-Leste. Viabilidade husi problema sira iha area saude mos sai makaas liu husi faktu katak, tinan-tinan Timor oan barak mak ba rai seluk hodi halo tratamentu saude, tanba fasilidade saude iha Timor-Leste seidauk natoon atu fo atendimentu ba moras balun neebe kompleksu no komplikadu liu,” lia hirak nee hatoo husi Sekretariu Jeral RENETIL, Joaquin da Fonseca hatoo liu husi konferensia imprensa iha sede RENETIL Palapasu, Segunda (15/01/2024).

Nia dehan, ho rekursus umanus iha medisina no area relevante sira aumenta tan iha kualidade no kuantidade. Iha duni melhoramentu iha sistema saude, too intervensaun balun neebe baibain halo iha rai seluk, ikus mai bele halo ona iha Timor-Leste. Hanesan fase ran, operasaun sezariana no sirurjia seluk tan.

“Naturalmente ita hanoin katak, grafiku ba melhoramentu nee atu kontinua sae. Maibe iha realidade too nivel ida, mosu ona estignasaun. Publiku kontinua lamenta konaba kualidade atendimentu iha fasilidade saude sira iha TL, ” hatete nia.

Iha fulan Junhu 2023, RENETIL hamutuk ho CNC halo diskusaun nakloke ida iha edifisiu Komarka Balide ho tema sistema saude nuudar instrumentu ba libertasaun povu, diskusaun ida nee mos identifika problema sira.

Falta aksesibilidade populasaun iha area remota ba fasilidade saude, falta ekipamentus mediku no aimoruk hodi fo atendimentu saude neebe aksesivel no ho kualidade ba povu tomak, no rekursus umanus iha area saude, haree husi kuantidade, kualidade no distribuisaun, ladauk naton atu garante asesibilidade no fornese atendimentu saude ho kualidade ba populasaun tomak.

“Ho instalasaun IX Governu Konstitusional, ita hanoin katak problema sira nee bele hetan solusaun, no kobertuda no kualidade atendimentu saude iha Timor-Leste sai diak liu tan, no esperansa ba ida nee sai boot liu tan tanba partidu sira neebe konstitui IX Governu Konstitusional hotu-hotu iha ajenda klaru kona ba saude,” katak nia.

Nia dehan, iha sira nia kampanha eleitoral, Partidu CNRT kompromete atu dezenvolve area saude ida neebe inkluzivu ho kualidade no Partidu Demokratiku hatete dehan, dezenvolve seitor saude, hadia Hospital Nasional Guido Valdares no hospital iha munisipiu sira.

Aleinde nee Observasaun Politika UNTL Felisberto de Carvalho informa, TL nafatin preokupa ho sistema saude iha publiku.

“Problema iha setor saude nee uluk kedas too mai agora, tanba ita sempre hasoru problema aimoruk, problema rekursu humanu, problema fasilidade saude nomos sira seluk tan, nee ita haree realidade, “hatete nia.
Nia dehan, hasoru problema sira nee tanba governu aloka orsamentu ba Ministeriu Saude nee kiik, entaun nafatin hamosu problema saude.

(nat)

LEAVE A REPLY

Please enter your comment!
Please enter your name here