RHTO Relata Preokupasaun Ba PR

Organizasaun Raes Hadomi Timor Oan (RHTO) relata preokupasaun konaba bee no sanemanetu, nebee durante nee ema ho defisensia hasoru ba Prezidente Republika (PR) Francisco Guterres Lú Olo. (Foto: Media PR)

DILI, STLNEWS.co – Organizasaun Raes Hadomi Timor Oan (RHTO) relata preokupasaun konaba bee no sanemanetu, nebee durante nee ema ho defisensia hasoru ba Prezidente Republika (PR) Francisco Guterres Lú Olo.

Diretor Ezekutivu Raes Hadomi Timor Oan (RHTO), hanesan mos portavos João Zito dos Santos hatete, ohin sira hasoru PR hodi relata preokupasaun assuntu bee no saneamentu neebe mak durante nee sira infrenta hela.

“Ohin ami ekipa husi sosiedade sivil, neebe mak kompostu husi plataforma nasional bee no saneamentu, no asosiasaun halibur matan RAES hadomi Timoroan ho grupu feto foinsae ami hasoru Prezidente Republika, ho objetivu atu relata assuntu bee no saneamentu hijiene neebe mak inklusivu ba ema ho defisente, hatoo ba Prezidente katak bele hatoo hela ami nia ezijensia no preokupasaun hirak nee ba Primeiru Ministru nomos ba Ministeriu relevante sira,” dehan João.

Portavos nee dehan, iha enkontru nee hatoo mos assuntu sira seluk neebe mak liga ba ema ho defisensia konaba justisa, saude, no edukasaun nia, tanba ema ho defisensia barak mak seidauk asesu ba dezenvolvimentu nasional rai laran nia, no orsamentu jeral neebe aloka latau masimu no sufisente ba area defisensia, tanba nee mak sira hatoo hela kestaun hirak nee ba iha PR Lú Olo.

“Prezidente Republika mos simu no sei hatoo ba Premeiru Ministru ba ezijensia sira neebe ohin ami hatoo hamutuk ho kolega sira hatoo katak assuntu nee pertinente tebes tanba liga ba direitus humanus, katak bee nee hanesan direitu ba universal nia, no direitu baziku no direitu humanus katak ema hotu iha direitu igual hanesan atu asesu, hanesan mos ema ho defisensia, no iha buat barak neebe mak ohin ami hatoo ba PR.” katak nia.

Diretor nee dehan, enkontru neebe mak naruk maizumenus oras ida nia laran, no PR mos hatoo nia vontade no responsabilidade hodi hatoo ba PM no ministeriu relevante sira.

Nia hatutan bee no saneamentu nee hakerek mos iha konstituisaun republika katak, ema hotu iha direitu atu bele asesu.

João dehan, antes nee sira mos hasoru ministeriu relevante sira hanesan Ministeriu Obras Publika, nunee mos Parlamentu Nasional, Vice Primeiru Ministru ba Assuntu Koordenasaun Urbanizasaun Planeamentu, no sira hatoo ona ezijensia konaba preokupasaun bee no saneamentu, no ohin hatoo tan ba PR.

Iha enkontru nee, Prezidente Republika Francisco Guterres Lú Olo mos konkorda katak, fasilidade bee ho saneamentu nee laos sai difikuldade deit ba ema ho defisensia, maibe ema laos ho defisensia deit mos seidauk asesu hotu bee no saneamentu.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here