Riku Soin TL Mak Ema

Prezidente Republika Francisco Guterres Lú Olo (Dok. STL)

DILI, STLNEWS.co – Prezidente Republika, Francisco Guterres Lú Olo hatete, riku soin neebe boot liu iha Timor Leste mak ema, tanba ema hanesan aset ba nasaun. Nia riku soin boot liu mak ema.

Xefe Estadu hatoo kestaun nee, liu husi diskursu bainhira iha serimonia festival Arte no Kultura, ih Palalasiu Presidencial Nicolau Lobato, Bairru Pite, Dili, Kuarta (25/11/2020).

“Timor Leste nia riku soin boot liu mak ita nia ema no ita nia ema sei fo sai nia hanoin liu husi arte ho kultura no lalaok oin oin, tanba kultura hanesan parte husi saida mak ita reprezenta, iha kultura mak bele regula buat neebe ita nia konvidensia no ita nia komunikasaun ba malu iha sosiedade ida nia laran,” hatete Xefe Estadu.

Lú Olo hatutan iha kualker sosiedade ida nia laran, kultura pasa husi jerasaun ida ba jerasaun seluk liu husi edukasaun manifestasaun artistika no forma sira seluk husi mos koinesementu. Nunee mos komportamentu husi ema idak idak sei defende husi aprendisazen kultural ida nee.

“Ita hotu tenke valoriza ita nia kultura tanba nia kapasidade edukativu, maibe kapasidade mos atu reforsa ita nia identidade nasional no kria unidade ba povu liu husi diferensa idea idak idak nian,” katak PR. Lú Olo.

Aman nasaun nee mos hatutan, kalan halibur hamutuk iha palasiu hodi asiste faze ikus liu kompetisaun nasional arte no kultura, no preparasaun ba grande durante fulan ida.

Partisipante sira hatudu no promove prezerva tradisaun no kultura hodi asegura katak, patrimonia kultura povu nia moris nafatin no bele identifika liu husi dansa kultural no muzika resistensia nuudar patrimonia kultura neebe kontribui, atu hametin unidade nasional.*

Reportajen: Emerenciana Pinto
Editora: Carme Xiemenes

LEAVE A REPLY

Please enter your comment!
Please enter your name here