Ro Success Nafatin Halo Operasaun

Prezidente APORTIL, Flavio Cardoso Neves. (Foto: Madalena Horta)

DILI, STLNEWS.co – Operasaun ro Success Dili-Oecusse nafatin lao, tanba pasajeirus barak ba antrian iha Portu Dili hodi halo viajen ba Oecusse.

Liu husi intervista Prezidente Aportil, Flavio Cardoso hatete, tuir informasaun katak, ema balu pozitivu Covid-19 neebe mai husi Oecusse, tan nee husu atu taka portu, maibe despaisu husi Prezidente RAEOA katak, husik atividade nee lao normal lai, no haree lai Covid-19 nee aumenta maka foin lockdown tanba ema balun pozitivu Covid-19 mai husi Oecusse.

“Hau hanoin operasaun ro tula pasajeirus ba mai Oecusse nee lao diak hela, tanba loron boot natal ho tinan foun, halo ema barak maka fila ba hamutuk ho sira nia familia, no atu kontrola diak liu tan Covid-19 maka, parte saude tenke koopera nafatin ho Portu Dili, liu liu ro neebe tula pasajeirus ba mai Dili- Oecusse,” dehan Prezidente Aportol, Flavio ba STL, iha Portu Dili, Segunda (28/12/2020).

Nia afirma ro neebe agora tula pasajeirus ba mai nee maka, ro Success deit tanba Nakroma sei halo hela manutensaun, tan nee aportil hakarak husu ba parte saude atu koopera nafatin hodi halo kontrola ba maluk sira nee mai husi Oecusse.

“Hau hanoin Ministeriu Saude tenke fo importansia ba ro Success neebe tula pasajeirus ba mai Oecusse, tanba Oecusse fronteira ho Indonezia, tan nee fasil ba ema atu tama mai TL, tan nee saude tenke kontrola, selae maka ro tula ema 300 resin karik ida pozitivu maka seluk nee bele daet hotu, tan nee hahu agora ita tenke antesipa,” dehan Prezidente Portu Dili.

Reportajen: Madalena Horta/Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here