Rui: 2 Pozitivu, Posibilidade Dili Aban Lockdown

DILI, STLNEWS.co – Koordenador Forsa Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo, liu husi konferesia impresa kalan nee dehan, komesa aban blokeia ona area Tasi-tolu, tanba iha sidadun nain 2 pozitivu Covid-19 iha Tasi-tolu.

“Restreiu neebe ita halo iha Bairru BTN II area Tasi-tolu, ita hetan ema nain rua pozitivu ohin lorokraik, sidadaun nain rua neebe maka rezultadu teste fo sai pozitivu Covid-19 nee hela vizinu ho kazu neebe ita detekta iha Baucau, husi 289 neebe mak ita foti iha bairru nee, nain rua mak pozitivu,” dehan Koordenador Forsa Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo iha ba jornalista sira iha Domingu kalan, iha Sala Situasan Sentru Integradu Jestaun Krize (SIJK) fatin, CDD (07/03/2021).

Nia dehan oras nee dadaun ekipa sira halo ona, resteriu tan ba kontaktu sira husi sira nain rua, sira nian rua neebe pozitivu nee servisu iha administrasaun publika iha ministeriu balun.

Maibe SIJK koordena ona ho autoridade lokal atu temporariamente blokeia lai aldeia Terra Santa hahu husi rate rai-kotu ninian ba too iha rohan, husu ba populasaun hakmatek hela iha uma laran labele halo movimetu tun sae, no fo tempu ba ekipa konjunta saude hodi halao servisu.

Nia esplika, desizaun atu blokeia ka lockdown ba iha area Tasi-tolu no mos kapital Dili nee mai husi Konsellu Ministru aban mak sei deside.

“Kompetensia atu fo desizaun konaba blokeia fatin sira nee governu ninian, tanba governu nee orgaun kolezial sei halo reuniaun liu husi Konsellu Ministru, embora exelensia PM hanesan komandante operasional, nia informadu ona konaba medida temporariu neebe foti ona, depois aban KM sei foti desizaun formal,” nia informa.

Nia mos husu ba komunidade sira iha kapital Dili labele paniku no labele rona rumor sira neebe espailla iha media sosial, maibe fiar deit ba ekipa konjuta saude nian, nunee bele hatan informasaun loloos.

“Populasaun sira labele paniku ba rumoris sira neebe sirkula iha publiku tanba nee bele inventa sasan, nunee fiar nafatin ba autoridade governu no estadu hodi bele kombate situasaun estadu emerjensia neebe ita enfreta,” afirma nia.*

Reportajen: Jeniche da Costa
Editor: Crisogono Magalhães

LEAVE A REPLY

Please enter your comment!
Please enter your name here