Samuel Guido Martins, Eis Photographer Associated Press Husik Hela Mundu

DILI, STLNEWS.co – Situasaun tristeza hafanun hela familia boot Samuel Guido Martins alias Samday, kolegas jornalista antigu sira, organizasaun photographer ajensia internasional iha Timor Leste no mundu, liu-liu vizinhu no povu iha Aldeia Haburas, Suku Bairo Pite, Postu Administrativu Dom Aleixio, Munisipiu Dili.

Eis photographer Ajensia Internasional Association Press (AP), Samuel Guido Martins husik hela mundu hodi fila hikas ba Aman Maromak Nia Kadunan Santu.

Samday mate iha nia hela fatin, Aldeia Haburas, Suku Bairo Pite, Postu Administrativu Dom Aleixio, Munisipiu Dili. Matebian hela mesak deit. Uma neebe nia hela nee hateke malu ho uma eis Xefe Aldeia Haburas, Celestinho.

Laiha ema ida hatene kona ba data matebian nia mate. Vizinhu sira hakfodak bainhira horon iis husi matebian nia uma. Matebian nia portaun save hela no nia motor mos para hela iha beranda. Ho situasaun ida ne’e, eis Xefe Aldeia Haburas, Celestinho, bolu Polisia Nasional Timor Leste (PNTL) ne’ebe fo siguransa ba komunidade Surik Mas atu haree direita situasaun iha matebian nia uma laran.

Bainhira membru PNTL ida tama uma nee, matebian toba hela iha nia kuartu no ran sai ona husi nia inus. Ida nee foin hatene katak matebian hakotu ona nia iis.

Vizinhu sira nadodon mai iha matebian nia uma hodi hato’o sentidu kondolensia. Maibe, ema ida la-berani atu tama matebian nia uma hodi haree mate isin, razaun tamba situasaun Covid-19.

Eis Xefe Aldeia Haburas, Celestinho fo sasin katak iha loron hirak liu ba nia hasoru matebian atu impresta nia fiu elektrisidade.

“Momentu hau hasoru nia, kondisaun matebian diak hela. Hau hatene matebian moras estomuk. Maibe, bainhira hau fo hatene nia atu ba halo tratamentu nia saude iha hospital, nia dehan hemu aimoruk tradisional deit. Nia dehan ba hau katak iha nia uma oin iha aitahan ida bele kura moras hotu-hotu,” dehan Celestinho.

Sasin seluk, Oscar Salsinha, dehan katak iha loron Segunda (5/7/2021) nia sei hasoru matebian iha nia uma. “Matebian mak telepon hau mai nia uma no hau konsege sosa supermi ida ba nia. Hau haree nia kondisaun saude diak hela. Maibe, nia moras estomuk kroniku duni. Hau lahatene, nia mate nee tamba moras estomuk nee mak ataka nia ou moras seluk,” dehan Oscar bainhira mai iha mate uma, Segunda (12/7/2021) kalan.

Tuir Oscar, iha Sesta (9/7/2021) nee, matebian sei sosa nia nesesidade iha kios. Nune’e, maizumenus matebian mate iha Sesta ou Sabadu. “Ita lahatene data fiksu tanba nia hela mesak deit,” katak Oscar.

Iha Segunda kalan, autoridade lokal sira mai duni iha mate uma, maibe sira labele halo buat ida tanba hosi parte saude nian la mai. Tamba nee, iha Tersa (13/7/2021) mak ekipa hosi pilar hitu nia mai iha mate uma. Parte saude nian foti swab Covid-19 no lori ba laboratorium nasional atu hatene matebian mate tamba Covid-19 ou moras komplikadu.

Jornalista antigu neebe uluk servisu iha Suara Timor Timur (STT), JB Kleden hateten nia koñese matebian iha tempo Indonezia. “Hau sempre ba matebian nia uma iha Bidau, tanba iha studio mini foto iha nia uma. Nia sempre hanorin hau kona ba asegura negativu film. Nia mos sempre haruka nia foto publika iha STT.

“Om Sam selamat jalan. Sedih membaca kematianmu kawan. Terima kasih untuk pertemanan kita selama masa-masa di STT hampir satu dasawarsa 1993-1999,” dehan JB Klenden ho lian Indonezia.

Entretantu, antigu jornalista Mikael Mali Mau mos fo sasin katak nia sempre hasoru matebian iha nia uma. “Bainhira ami hasoru malu konta deit kona ba ami nia istoria iha pasadu. Hau sei lahaluha matebian nia karya ida, bainhira asisti hau nia festa kazamentu iha Lamaknen, 7 Junhu 1996. Matebian ho kolega jornalista antigu lubuk mak hanesan Santina Araujo, Joao Bareto, Gaudensius Mau, Otelio Ote no seluk neebe hau la temi naran asisti hau nia festa kazamentu ne’e. Matebian ho kolega Otelio Ote mak abadikan ami nia serimonia kazamentu nee ho photo no kamera RCTI nian,” dehan Mikael Mali Mau.

Irawan Saptono, editor senior iha STT mos hatoo sentidu kondolensia ba matebian nia familia atu korajen nafatin ho situasaun ida nee. Nia dehan, nia hasoru matebian iha tinan 6 liu ba iha Becora.

“Momentu nee nia hemu tua too lanu, maibe nia sei koñese hau. Boa viajem kolega,” katak Irawan.

To’o agora mate isin sei iha nia uma no rezultadu swab covid-19 seidauk sai. Vizinhu sira preokupa ho situasaun ida nee tamba sira la tahan horon iis hosi matebian nia uma.

Reportajen: Mikael Mali Mau
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Covid-19 Update (26 Jullu 2021): Pozitivu 6, Rekoperadu 45, & Ativu 656

DILI, STLNEWS.co - Loron 26 fulan Jullu liu Centro Integrado Gestão de Crises, Sala Situação (CIGC-SS) rejistu kazu pozitivu Covid-19 iha nain 6, Dili...

Demisaun Membru PNTL 3, PN Rekonese Bazeia Ba Regulamentu

DILI, STLNEWS.co - Parlamentu Nasional (PN) liu husi komisaun B neebe trata asuntu defeza seguransa no negosiu estranjeiru rekonese demisaun membru Polisia Nasional Timor-Leste...

Komisaun F Seidauk Aprova Projetu Lei Protesaun Ba Labarik

DILI, STLNEWS.co - Parlamentu Nasional (PN) liu husi Komisaun F trata asuntu Saude, Seguransa Sosiais no Igualidade Jeneru, seidauk aprova projetu lei protesaun labarik...
%d bloggers like this: