Sarani Hosana Dili, Selebra Aniversariu Igreja Ba Dala 41

DILI, STLNEWS.co – Sarani Igreja Hosana Dili, liu husi serimonia misa agradesimentu, hodi selebra loron aniversariu Igreja Hosana Dili ba dala 41 (21 Setembru 1980-21 Setembru 2021) neebe halao iha Salaun Multifunsaun Hosana Dili, Domingu nee (19/09/2021).

Misa agradesimentu nee prezide husi Xefe  Sarani Igreja Hosana, Pastor Moises A. da Silva, no partisipa husi sarani no Sekretariu Sinodo Igreja Protestante iha Timor Lorosa’e (IPTL), Pastora Juliana Temparadja, inklui konkorente nain tolu neebe kompete iha kanta musika solo, hanesan, Mateus da Costa, Leonizio Moniz Gusmao no Anastacia Abilio Viana Gomes. Partisipa mos artista Daniel Tome Pereira Boavida (Danny) hanesan ekipa juri ba kompetisaun kanta musika solo iha Sabadu horiseik (18/9/2021). 

Iha misa nee mos halao serimonia simu sakramentu baptismu ba labarik hamutuk nain neen (6).

Liu husi misa nee, Pastor Moises hato’o agradese wain ba Komisaun Organizadora neebe xefia husi Eben Rifqy Taufan Sitopu, hodi realiza eventu kompetisaun kanta musika igreja nian, hodi selebra loron aniversariu Igreja Hosana Dili ba dala 41.  

“Eventu kompetisaun kanta musika igreja nian nee, finalmente realiza iha Salaun Serbaguna Igreja Hosana Dili, Sabadu horiseik (18/09/2021) kalan, no konsege hetan juventude nain haat (4), neebe hatudu sira nia talentu iha musika. Liu husi biban ida nee, hau hato’o agradese ba ekipa neebe servisu makaas iha situasaun Covid-19 nia laran, to’o realiza eventu ida neebe kapas tebes – tebes,” dehan Pastor Moises.

Aleinde nee, Pastor Moises mos hato’o agradese wain ba sarani no Konsellu Evanjelizasaun Sarani Hosana (KESH) Dili nian, neebe partisipa iha misa selebrasaun loron aniversariu Igreja Hosana ba dala 41. “Hau hato’o agradese ba sarani no Konsellu Evangelisaun Sarani Hosana (KESH), tanba maske iha situasaun pandemia Covid-19, maibe ita bele hamutuk hodi selebra loron moris igreja nian nee,” dehan Pastor Moises.

Maske nunee, Pastor Moises hateten katak, iha selebrasaun loron moris Igreja Hosana nian nee, sarani protestante lakon nia ema ida neebe sai hanesan pioner, harii Igreja Prostestante iha Timor Leste. Nia mak Ana Maria Fernandes de Vasconcelos. Matebian Ana Maria Fernandes de Vasconcelos husik hela mundu iha loron 1 fulan Setembru tinan 2021. 

“Maromak bolu ona Ana Maria Fernandes de Vasconcelos ba nia kadunan lalehan. Agora ita hotu sei iha situasaun tristeza nia laran. Ita hotu reza nafatin ba Aman Maromak, atu fo fatin diak ba Ana Maria Fernandes de Vasconcelos,” tenik Pastor Moises.

Misa remata, halao serimonia koa kek hanesan sinal selebrasaun aniversariu Igreja Hosana Dili ba dala 41. Akompana iha serimonia koa kek nee mak, Xefe Sarani Igreja Hosana Dili, Pastor Moises A. da Silva, Sekretariu Sinodo IPTL, Pastora Juliana Temparadja, Xefe Komisaun Organizadora, Eben Rifqy Taufan Sitopu no seluk – seluk tan.*

Reportajen: Yulius Ora/Mikael Mali  Mau

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 20 Outubru: Kazu Foun Hamutuk 16

DILI, STLNEWS.co - Ohin loron Sentru Integradu Jestaun Krize (SIJK) rejistu kazu foun hamutuk 16, iha Dili 14 no munisipiu seluk iha nain 2. "Kazu...

Membru F-FDTL Foun Ida Halai Lakon

DILI, STLNEWS.co - Membru foun FALINTIL Forsa Defeza Timor Leste (F-FDTL) ida ohin halai lakon iha sentru formasaun Metinaro tanba la augenta ho instrusaun...

Maromak La Dukur Ba Nia Ema

DILI, STLNEWS.co - Maromak mak iha kbiit tomak sempre akompanha ema hotu iha tempu saida deit no nunka dukur ba ema, tanba ne'e presiza...