AILEU, STLNEWS.co – Sarani husi Parokia Remexio Selebra Festa Padroeru nudar mahein ba sarani sira iha parokia nee.
Liu husi omilia Padre Selebrante Padre Geovanni Melo de Sousa iha igreza Parokia Remexio Segunda nee (01/05/2023) hatete, selebra festa padroeru, iha biban nee labarik hamutuk 183 prepara aan simu Jesus Kristu nia futar isin no raan ba dala uluk.
“Belun doben sira mak ita Nain Jesus Kristu hadomi, ohin selebra ita nia Padroeru Saun Jose no ita nia mahein nia festa momentu neebe ita reflete mak nee, ita halo tuir modelu moris Saun Jose nia nudar mahein ba ita nia parokia,” dehan Padre nee.
Iha selebrasaun Saun Jose konvida ema hotu fiar nain atu halo tuir modelu Saun Jose nia no husu tulun ba Saun Jose atu haraik espiritu ba ema hotu liu-liu aman sira hodi sai modelu tuir aman Saun Jose nia ain fatin.
Amu Paroku nee haktuir, loron 01 fulan Maiu igreza didika mos nudar Fulan Nain Feto nian, no Saun Jose mos iha nia fiar hodi halo tuir Maromak nia hakarak, hodi sai aman ba Nain Jesus Kristu.
Saun Jose mak Maria nia laen no Jesus nia aman, no halo tuir Maromak nia haruka liu husi Anjo neebe fo hanoin ba nia.
“Jose nudar aman neebe nakonu ho domin atu tane Jesus nakonu ho esperansa nudar aman neon nain, hodi tau matan kuidadu Jesus hodi halo tuir Maromak nia hakarak, tanba nee simu Maria nudar nia kaben,” katak Pe.
Tuir observasaun neebe mak STL hetan, selebrasaun Festa Padroeru Saun Jose nia partisipa masimu husi sarani sira Parokia Remexio, iha Festa Saun Jose nia labarik ou sarani Nain 183 simu primeiru komunhaun.
Selebra Loron Padroeru Saun Jose Operario Parokia Remexio no misa nee selebra husi Padre Geovanni Melo de Sousa no Padre Justino.
(eme)
