Sasan Uza Dalen Xina, Konsumidor Lakomprende

Diretor Asosiasaun Tane Konsumidor, Leonito Ribeiro. (Foto: STL/Claudios de Jesus)

DILI, STLNEWS.co – Sasan importasaun husi Xina sempre uza dalen ka lingua Xina. Ho nunee, konsumidor sira lakomprende no utiliza sasan latuir direitu konsumidor.

Dehan Diretor Asosiasaun Tane Konsumidor, Leonito Ribeiro ba jornalista iha Universiade da Paz, Sesta (16/10/2020).

Tuir Leonito katak, lases husi preokupasaun nee Asosiasaun Tane Konsumidor kolabora hamutuk ho Fakuldade Direitu husi Universidade da Paz, hodi halo sosializasaun kona-ba direitu konsumidor sira nian, liuliu ba sasan sira neebe mai husi nasaun Xionan hakerek ho lian Xina.

Tane Konsumidor hakarak servisu ho Fakuldade Direitu. Tanba fakuldade direitus iha materia neebe koalia kona-ba direitu de konsumidor nian.
Maibe iha pratika dalaruma publika iha Facebook ho televizaun konsumidor sira sempre reklama kona-ba sira nian direitu kona-ba ladun satisfas uza sasan sira neebe importa husi Xina tanba sasan hirak nee mesak hakerek ho dalen Xina.

Ho nunee liu husi sosializasaun nee bele informa ba konsumidores hotu hanesan konsumidor sira neebe maka uza sasan importadu, hanesan hahan tantu elektronika.

Se bainhira uza sasasn sira nee ladun satisfas bele hatoo keixa liu husi dalan neebe Tane Konsumidor kria ona.
Maske, sosializasaun nee mos foin primeiraves hahu iha UNPAZ, tanba durante nee so rona deit liu husi media.
Nunee mos, sasan sira neebe eziste iha loja nia frazu sempre iha no buat hotu lao tuir lei.

Tanba nee kuandu konsumidor sira hetan sasan sira neebe prazu liu ona sira atu ba hatoo keixa mos seidauk komprende. Tanba nee, sosializasaun importante atu bele esplika no fo dalan ba konsumidor sira kona-ba oisan atu consume no uza sasan sira nee.

Nia salenta katak, kondisaun sidadaun Timor oras nee, komesa husi Prezidente too mai povu kiik konsumu sasan importasaun deit tanba Timor seidauk iha produsaun lokal.

Haree ba kestaun nee, espesifiku ba sasan importasaun husi Xina, sempre hakerek sasan sira nee ho sira nia lian. Ida nee, difikulta ema utiliza sasan latuir nia direitu.

Tanba tuir lei hateten katak ema atu utiliza kualkera sasan nian tenke kunhese didiak funsaun husi sasan nee. Tanba ita lakunhese bele halakon ita nia direitu, hanoin katak sasan nee kualidade diak.

Maibe realidade sasan nee kualidade ladun diak, tanba sasan nee uza lingua neebe ita lakomprende.

Ho preokupasaun nee, Asosiasaun Tane Konsumidor sujere ba governu atu sasan sira neebe tama Timor tenke utiliza ho lingua oficial atu nunee, konsumidores sira mos bele kumpriende, nunee konsumidor labele sai vitima ba sasan hirak nee.

Husu mos ba kompania inportador sira atu labele faan sasan neebe nia prazu liu ona. Tanba ho lingua neebe hakerek iha produtu hirak nee ho dalen Xina halo konsumidor sira lakomprende.*

Reportajen: Claudios de Jesus
Editor: Ekipa STL

LEAVE A REPLY

Please enter your comment!
Please enter your name here