DILI, STLNEWS.co – Nasaun demokrasia fo oportunidade ba politiku nain sira atu aprezenta sira nia planu no progrma neebe diak ba povu, tanba programa diak mak povu sei hili hodi lidera nasaun ida nee, durante ukun tinan lima, maibe promete atu lori naroman ba povu no fo subsidiu oin-oin, nee tenki realiza bainhira kaer ukun, laos atu promete deit iha kampanha.
Lia hirak nee hatoo husi emprezariu antigu, Oscar Lima ba STL iha nia knaar fatin Fomento Dili, Kinta nee (04/05/2023).
“Hau husu ba maun boot sira hotu, liu-liu partidu 17 neebe kompete iha eleisaun ida nee, atu se deit mak kaer ukun, importante ba ita mak lori moris diak ba povu no nasaun, no bainhira hetan fiar husi povu hodi kaer ukun karik, tenki realiza promesa ba povu, liu-liu lori povu ba naroman, apoiu subsidiu ba estudante sira, subsidiu ba agrikultor sira, hirak nee hotu tenki realiza, labele promesa iha kampanha deit,” esperansa setor privadu nian ba governasaun foun.
Nia mos afirma liu tan katak, hanesan setor privadu la haree ba partidu ida neebe mak diak liu, maibe importante ba povu mak se deit mak kaer ukun tenki hadia duni povu nia moris, hadia dezenvolvimentu iha rai laran, ho nunee bele lori moris diak ba povu no nasaun, tanba partidu hotu-hotu nia luta oras nee daudaun atu lori povu ba moris diak, laiha partidu ida hakarak nia povu moris aat, tan nee hanesan setor privadu husu se deit mak ukun tenk realiza promesa ba povu.
Iha parte seluk, koordenador Lao Hamutuk, Celestino Gusmao Pereira hatutan, agora daudaun politku nain sira hahu halo kompromisu ba povu tanba atu hetan votus husi povu, tanba nee sira hahu promete katak, atu lori naroman ba povu, fo subdidiu ba estudante sira nomos povu agrikultor sira.
“Promesa sira nee sei realiza duni ka lae, no lori sai duni povu husi nakukun ba naroman ka lae, maski asuntu nee importante tebes ba povu, maibe atu realiza sai realidade mak labele koalia deit iha tempu kampanha hodi buka votus, maibe tenki iha asaun estratejiku ruma,” dehan Sosiedade Sivil nee.
Nia akresenta, atu lori naroman ba povu tenki iha definisaun klaru povu iha nakukun nee nia sentidu saida? No saida mak nudar asaun ida neebe bele oferese oportunidade atu povu rasik bele hakat sai husi statuta ida kiak, dezempregu, malnutrisaun, dependensia ba importantasaun no problema estrutural sira seluk bele iha redusaun ka mudansa signifikante ka lae, laos koalia deit ikus mai laiha asaun, tanba konsetu importe mak tenki aprofunda liu tan, oinsa mak bele atinji objetivu final husi lori naroman ba povu, no lori sai povu husi nakukun nian ba naroman.
(mad)
