Seidauk Hatene Paradeiru Restus Mortais Heroi; Governu Tenke Husu Funu Maluk Hatudu

Deputadu Bankada Fretilin, David Dias Mandati. (Foto: STL)

DILI, STLNEWS.co – Too oras nee heroi Timor Leste balu sira nia restus mortais seidauk hatene paradeiru, deputadu sira iha Parlamentu Nasional husu governu tenke buka dalan husu tuir funu maluk sira atu hatudu, hodi bele haloot iha fatin.

Kestaun nee hatoo husi Deputadu Bankada Fretilin David Dias Mandati katak, fulan hira liu ba nia foti problema restus mortais, heroi sira neebe too ohin loron seidauk hatene sira nia paradeiru, ema hotu konsitente katak sira nee mate, neebe too ohin loron maluk ka amigus funu maluk sira bele hatudu ona, Timor nia restus mortais sira nia fatin iha neebe? atu bele haloot sira iha fatin loo-loos.

“Governu tenke esforsu, halo ona buat ruma, hodi husu tuir ita nia funu maluk sira neebe sei iha, atu labele failla tan hodi lahetan heroi sira nia restus mortais, tanba ita nia heroi sira husi Nicolau Lobato too fali David Alex no sira seluk tan, ita seidauk hatene sira nia paradeiru”, katak Mandati iha PN Segunda (22/02/2021).

Nia dehan, restus mortais sira nee too ohin loron seidauk hatene pardeiru iha neebe, sa mak impede Timor hodi labele husu tuir, Timor ba mai diak malu ona ho maluk funu nain sira, maibe sa mak impede hodi lahusu tuir.

“Hau tauk mak ita hein too ita nia funu maluk sira nee laiha hotu, mak ita husu tuir fali entaun sira nia jerasaun mai dehan lahatene, neebe ohin loron sira sei iha, nee ita husu tuir ona”, tenik Deputadu David.

Tuir nia, Timor nia funu maluk sira, uluk mai too ohin loron, sira harii ona semiteriu ba sira nia restus mortais heroi sira, maibe sira seidauk hatudu Timor nia heroi sira paradeiru iha neebe.

Nunee mos Deputadu husi Bankada PLP Abel Pires katak, konaba restus mortais nee Timor-Leste ukun aan besik tinan 20, maibe heroi sira neebe sakrifika sira nia an lahatene sira nia ruin oras nee iha neebe.

Reportajen: Guilhermina Franco/Domingas Soares
Editora: Domingas Gomes

LEAVE A REPLY

Please enter your comment!
Please enter your name here