DILI, STLNEWS.co – Roo Berlin Ramelau neebe maka governu Timor Leste liu husi Ministeriu Transporte no Komunikasaun (MTK) sosa, no Timoroan rasik maka sai hanesan tripulante ba roo refere, seidauk too tinan soke hela deit bainhira atraka iha portu Oecusse.
Informasaun nee hatoo husi pasajeiru Mateus Lopo katak, horiseik dadersan molok roo Berlin Ramelau atraka iha portu Oecusse, tan nee roo refere soke parajen portu nian, rezulta kuak no naklees boot rua husi parte karuk.
“Horiseik dadersan molok roo atraka iha portu Oecusse, pasajeiru hotu kontente hotu katak besik ona atu tuun ba rai moris fatin, maka derepente roo tarutu makaas, no hatudu kuak ka naklees rua iha parte karuk,” dehan nia ba STL liu husi telefone Oecusse, Domingo kalan (17/04/2022).
Nia haktuir tan, antes nee akontese primeiru iha loron 23 fulan Dezembru tinan 2021, rezulta odamatan aat loke la diak, horiseik akontese nafatin nunee.
Hanesan Pasajeiru Atoni oan ida senti triste, tanba haree realidade hanesan nee, maibe seidauk hatene loloos kapasidade kapitaun roo nee oinsa.
Iha sorin seluk komunidade Atauro, Mateus dos Santos katak, presiza hatene problema ka husi ema sira neebe maka lori roo nee, nunee labele akontese tan hanesan nee, tanba roo nee mai ba povu, no tenki kuida ho diak.
Entretantu iha loron 5 fulan Abril, membru Parlamentu Nasional entre bankada KHUNTO no CNRT, Olinda Guterres ho Domingos de Carvalho hamosu diskuti malu ka duun malu relasiona ho kapasidade kapitaun hirak neebe maka lori roo refere, nunee bele hadia sistema ka hatene tuir saida maka akontesimentu hela deit asidente, bainhira atraka iha portu refere.
(EST/01)
