SEJD Bolu Lideransa IKS – 77

Sekretariu Estadu Juventude no Desportu (SEJD), bolu lideransa husi organizasaun artemarsial IKS PTL no 77, hodi buka solusaun ba konflitus neebe akontese iha loron hirak liu ba. (Foto: STL/Donaciano Magalhães)

DILI, STLNEWS.co – Sekretariu Estadu Juventude no Desportu (SEJD), bolu lideransa husi organizasaun artemarsial IKS PTL no 77, hodi buka solusaun ba konflitus neebe akontese iha loron hirak liu ba.

Kestaun nee hatoo husi SEJD, Abrão Saldanha ba jornalista sira, iha SEJD, Sesta (26/03/2021).

Nia dehan, ohin reuniaun ho arte ritual 77 no artemarsiais IKS PTL hodi buka informasaun konaba konflitus neebe agora dadauk akontese iha Dili laran entre elementu husi organizasaun nian.

Sira mai aprezenta konaba saida mak sira nia organizasaun rasik haree husi kazu ida nee, oinsa bele buka solusaun. Solusaun auotomatikamente krime lori ba tribunal. Agora dadauk autor neebe pratika krime iha hela investigasaun.

“Organizasaun rua nee ohin hau apela ba sira, tanba membru sira halo krime nee lori naran organizasaun, entaun organizasaun presiza responsabiliza no fo hatene ba membru sira, atu koalia konaba atu labele abitua lori naran organizasaun,” tenik SEJD Abrão.

Governante nee afirma, presiza haree hamutuk oinsa sai husi problema, tanba konflitus entre artemarsial tinan barak ona. Governu halo esforsu dialogu fali ho artemarsial sira para harii lejislasaun ida propria akomoda tuir hotu hotu nia interese no interese estadu.

Abrão haktuir, governu mos preokupa ho akontesementu loron hirak liu ba, liu liu iha hela tempu ida neebe transmisaun komunitaria luta hela ba Covid-19, nee mak bolu lideransa sira mai iha nee hodi rona sira ida idak nia parte, i sira rasik mos la autoriza no la orienta sira nia organizasaun atu halo konflitu.

Iha fatin hanesan Mestre husi Organizasaun Arte Ritual 77, Abilio Soares hatete, kazu sira neebe akontese liu ba hanesan responsavel mos la hatene, maibe mai iha nee atu bele fo sai mensajen ruma, i toma responsablidade ba sira neebe halo kazu iha neeba, se ikus mai sira halo kazu nee kazu individual entaun tenke koopera ba lei no justisa.

“Kaer sira lori ba iha neeba hodi husu karik ami mak haruka prontu atu hatan, sei laos ami mak haruka sira halo arbiru haruka sira ba, tanba agora nasaun RDTL.” dehan nia.

Entretantu Prezidente IKS PTL, Silvestre Xavier Sufa hatete, sira hetan konvite husi SEJD no mos Prezidente KRAM, hodi reuaniaun relasiona ho konflitus neebe mak akontese.

Nia informa, sira nia rejimentu nem hatete konaba ema ida bele halo violensia, filosofia artemarsiais la hatete konaba atu halo torturasaun ba maluk seluk, tanba moris hanesan nasaun RDTL iha nia konstituisaun estadu direitu demokratiku, signfika katak lei mak boot liu hotu hotu, see mak halo violensia entrega autoridade PNTL.*

Reportajen: Maria Tavares
Editor: Ekipa STL

LEAVE A REPLY

Please enter your comment!
Please enter your name here