DILI, STLNEWS.co – Sekretariu Estadu Komunikasaun Sosial (SEKOMS) selebra akordu ho media plataforma online hamutuk 18, hodi haforsa komunikasaun iha Timor Leste.
“Ohin SEKOMS asina akordu ho media plataforma online sira hamutuk 18 neebe halao knaar iha Timor Leste, nunee fortifika media nasional,” tenik SEKOMS, Expedito Ximenes ba jornalista sira iha Palasiu Governu, Dili, Kinta (05/10/2023).
Nia haktuir, antes nee SEKOMS asina ona akordu ho media impreme sira, agora ho online sira ho avansu dijital. Ida nee papel importante tebes iha prosesu konstrusaun estadu nasaun nian.
Governante nee akresenta, maski governu servisu hamutuk ho media sira nee, la signifika governu atu interven ba produtu jornalistiku nian. Ida nee politika media idak-idak nian, konserteza sira kesi ho kodigu etika jornalizmu nian.
Nia hatete, SEKOMS fo mensajen deit atu halo balansu entre liberdade imprensa ho responsabilidade ba populasaun Timor Leste, signifika produtu jornalista sira halao tantu estatal ho konvensional sira respeita kodigu etika jornalizmu ho kualidade informasaun nee publika iha publiku.
Nia dehan, papel media importante ba meius komunikasaun sosial mak forma opiniaun publiku, tanba publiku mos hakarak asesu informasaun kredivilidade ho kualidade.
Iha fatin hanesan, Reprezentante Media Online sira, Diretora Media One Timor, Suzana Cardoso agradese ba SEKOMS.
“Espera ho tulun neebe iha, ami bele publika publisidade no informasaun neebe mak iha ba publiku, nunee sustentabilidade media nian nee bele lao ba oin,” dehan nia.
Entretantu, media sira nee mak hanesan STL News, Timor Post online, Media ONE Timor, Naunil Media, Mudansa, Esperansa, Lafaek News, SMNews Timor, Independente, The Oekusi Post, Yokalau MÃdia no seluk tan.
(mar)
