Selebra Aniversariu Igreja Hosana Ho Kompetisaun Kanta Musika Virtual

DILI, STLNEWS.co – Komisaun organizadora ba loron aniversariu Igreja Hosana Dili ba dala 41 (21 Setembru 1980-21 Setembru 2021), sei realiza kompetisaun kanta musika virtual.

Xefe Komisaun organizadora ba eventu kompetisaun kanta musika virtual, Eben Rifqy Taufan Sitopo, hatoo lia hirak nee ba STL iha KBRI Dili, Sabadu (04/09/2021).

Tuir nia, objetivu husi eventu kompetisaun kanta musika virtual nee, atu apoiu governu prevene no hakotu korente virus corona, tamba ema hotu hakmatek iha uma deit, kuandu laiha aktividade urjenti neebe presiza ema tenke sai husi uma.

Nia esplika katak, faze no kriteria ba kompetisaun mak: grava no haruka konkorente sira nia video mai Nu. WA: 73598209 ou upload partisipante sira nia Facebook (FB) no tag mai FB page komisaun nian, inklui konkorente sira nia naran kompletu. Maneira mak hanesan; Francisco Soares Ximenes #kokursukantaigrejahosanadili2021. Data haruka hahu husi loron 27 Agostu-8 Setembru 2021, oras 17.00 OTL.

Kada konkorente aprezenta muzika rua (2) kompostu husi musika obrigatoriu no musika eskoilidu ida (1). Konkorente sira livre hodi uza instrumentu musika saida deit hodi halo gravasaun (guitar, piano, keyboard, nst). Konkorente sira probidu uza aplikasaun lian nian atu hadia lian (no autotune).

Xefe komisaun organizadora eventu kanta musika virtual nee mos hateten katak konkorente sira bele halo gravasaun direita uza telemovel ou instrumentu gravasaun nian. Ekipa juri sei hili no deside konkorente nain lima (5) diak liu hodi hakat ba faze final.

“Iha loron 12 Setembru 2021, sei anunsia manan nain neebe selesiona hodi hakat ba faze final. Faze final sei halao direita iha Igreja Hosana-Bebora, Dili, iha loron 18 Setembru 2021, tuku 17.30-remata. Bele iha mudansa hodi nafatin halao ho meus virtual, depende ba situasaun pandemia Covid-19 no regras neebe sei desidi husi governu,” tenik Eben Rifqy Taufan.

Xefe Imigrasaun KBRI Dili nee mos hatutan tan katak sei uza minus ona iha faze final. Tamba nee, ba finalista sira sei prepara sira nia musika audio minus ona hodi aprezenta, ou bele mos kontaktu komisaun hodi halo preparasaun. Konkorente sira livre hodi aranja/arrange sira nia muzika.

Tuir nia, lista musika neebe sei konkore mak hanesan, musika obrigatoriu ho titlu: Agradese Nai (Eben Rifqy Taufan Sitopu), musika eskoilidu iha musika nen hanesan; Indah pada waktunya (Eben Rifqy Taufan Sitopu/Gerson Oliveira), Hau riku, Di bawah Matahari (S.J Charles), Nafatin agradese (Isaias S. Guterres), Terangilah jalanku (Mitha Talahatu), Renungkanlah (Eben Rifqy Taufan Sitopu & Martinha de Sousa). Husi musika nen nee, konkorente sira hili ida deit.

“Komisaun sei halo esforsu tomak atu ita hotu kumpre nafatin protokolu saude no regra neebe deside husi governu relasiona ho pandemia Covid-19,” katak Eben Rifqy.

Kona ba premiu, Eben Rifqy hateten katak premiu neebe komisaun prepara ba manan nain sira mak primeiru lugar sei hetan osan $500, segundu lugar sei hetan osan $300 no terseiru lugar sei hetan osan $200.

Entretantu, Agus Feoh nuudar membru komisaun eventu kompetisaun musika virtual nee hateten atu realiza eventu refere, komisaun sei husu tulun ba parseiru sira, liu-liu empreza sira. “Ami hatama ona proposta iha empreza lubuk iha Dili, maibe seidauk iha resposta,” dehan Agus.*

Reportajen: Mikael Mali Mau
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: