Selebra Festa Natal Transforma Kualidade No Produtividade

DILI, STLNEWS.co – Selebrasaun Festa Natal fo inspirasaun ba sarani sira oinsa mak atu transforma ho kualidade moris ho produtividade keta halo hahalok aat ho foer.

Kestaun nee hatoo husi Padre Richardo Pasang, SVD ba STL liu husi telefone Kinta (24/12/2020), hatete Festa Natal nee transforma kualidade tanba nee mak presiza halakon hahalok aat no foer, no tenke valoriza folin boot salvasaun maromak nia.

“Natal Kristu inspira ita atu hasae kualidade moris no produtividade pessoal ou grupo ba transformasaun moris iha aspeto hotu, nee duni, keta hafoer-an ho hahalok aat sira tamba hahalok aat sira lori ita ba ksolok neebe la iha folin ba produtividade ba ita nia moris. Maibe, ita tenke valoriza folin boot Salvasaun Maromak nian iha Jesus nia moris ho hahalok nia atividades produtivo ba ita nia moris.

Tan nee, keta tauk hametin ita nia fiar ba Maromak tamba Maromak sei haraik bensa ba se deit neebe hakarak ou vontade diak ba transformasaun no mos hakarak atu hasae nia kualidade produtividade moris.” hatete Padre Richardo.

Padre hatutan ema Kristaun sira neebe iha vontade atu transforma nia moris mak ema neebe utiliza nia kapasidade no matenek hodi bele halo transformasaun iha situasaun neebe nakonu ho dezafios no difilkudade.

Maibe ema neebe laiha espirito transformasaun no esforsu hasae nia kualidade produtividade moris mak ema neebe moras no mate no laiha esperansa iha situasaun difisil nia laran.

Maske nunee, Maromak sempre dehan, “Hau hamutuk ho imi too mundo nia rohan”. Signifika katak maske iha situasaun difisil no difilkudades oi-oin maibe se mak hakarak transforma nia moris, Nai sei haraik bensa ba nia.

Jesus brani moris iha mundo, iha balada han fatin ho situasaun la favoravel, Jose no Maria tenke sakrificio lao dook atu buka fatin ba Jesus nia moris, Maria no Jose brani hatoba Kosok Oan Jesus Kristu iha fatin neebe nakonu ho foer bibi sira nian wainhira ema laiha interese, la iha sentimento no la loke odamatan ba Jesus Kristu nia moris, Maria ho Jose brani atu foti desisaun atu hatoba Jesus Kristu iha balada han fatin.

“Nee duni, maluk sarani doben sira mak Kristu hadomi, ita brani ka lae ho inspirasaun Natal Kristu nian atu halo transformasaun ba ita nia moris no hasae ita nia kualidade moris fiar nian ba Maromak iha situasaun neebe nakonu ho dezafios, brani ka lae ita hotu bele hatudu kualidade moris iha era milenial ida nee iha aspeto hotu nuudar humana, “ hatete nia.

Bibi Atan Uma Kreda nee hatutan selebra Natal selebra transformasaun no produtividade moris neebe kualidade, signifika katak soe konflito hotu neebe destrui kualidade produtividade pessoal no hamoris espirito transformasaun no konstrue.

“Iha inspirasaun Natal Kristu nian iha pandemia Covid-19, Nai hakarak atu hametin ita nia vontade diak hodi avansa ba transformasaun moris Kristaun no sai Kristaun kualidade no produtivu iha aspeto moris nuudar humana. Nee duni, espirito Natal Kristu nian, halo ita brani atu hateke ba oin, ba tinan foun hodi aranja stratejia moris hodi hasoru dezafio no difilkudade sira iha tinan oin mai. Tamba moris iha pandemia covid-19 no mos moris iha era milenial, kompetisaun moris makaas tebes. Tan nee, melhora kualidade no produtividade importante tebes ba ita Kristaun sira, inklui mos juventude milenial” katak nia.

Nia hatutan selebra Natal selebra transformasaun no produtividade moris neebe kualidade. Signifika katak soe konflito hotu neebe destrui kualidade produtividade pessoal no hamoris espirito transformasaun no konstrui.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here