Selebra Tinan Arquidiocese Dili, Laos Hanoin Festa

DILI, STLNEWS.co – Arche Bispo Metropolitano Dom. Virgilio do Carmo da Silva, SDB hatete, selebra tinan 80 Arquidiocese Dili, laos hanoin festa deit, maibe haree historia pasadu hodi hametin kreda Katolika iha rai laran.

Kestaun nee hatoo husi Arche Bispo Metropolitano, Dom. Virgilio do Carmo, SDB ba jornalista hafoin remata Abertura seminariu, iha Salaun Katedral-Dili, Sabadu (05/12/2020).

Dom Virgilio dehan, selebra Arquidiocese Dili 80 anos nee sai espasu ida biban ida, atu Diocese Dili hodi halo seminariu ida hanoin fali ba kotuk neebe liu ona, oinsa prozeta ba oin, katak, tinan rua nulu mai tan oin Arquidiocese Dili sei selebra nia tinan atus ida, prosesu nee hotu hanesan preparasaun ida, hodi mehi ba wainhira Diocese nee selebra nia sentinariu.

“Arquidiocese Dili selebra 80 anos laos hanoin kona ba festa deit, ida nee preparasaun ida no planu formasaun sira nee bele haforsa no hametin liu tan kreda nia Katolika iha rai ida nee, ida nee mak seminariu nia utilizasaun no importansia ba loron ohin nian,” hatete Dom. Virgilio.

Dom. Virgilio dehan, formasaun hanesan parte historia lori fila fali amu lulik madres, ajentes pastorais sira neebe partense ba topiku ida nee, tanba orador sira nia prenzensa bele tulun oituan atu konese diak liu tan, oinsa mai too mai tinan 80, historia naruk nee lalaok oinsa iha ninia diak iha ninia nakukun, naroman iha forte no frakeza mai too iha momentu ida nee.

Iha fatin hanesan Padre Joel Casmiro hatete, induljensia plenaria sai hanesan momentu transfigurasaun ida ba ema, momentu iha halibur malu.

“Induljensia plenaria atu simu transfigurasaun, ita presiza rona maromak nia liafuan,” dehan Padre Joel.

Tuir observsaun STL iha terenu, alende nee mos Parokia São Jose Aimutin halao peregrinasaun husi Aimutin too Katedral, atu manan induljensia plenariu, sarani sira tuir dalan hotu-hotu hakmatek lao ho orasaun, too iha Katedral deskansa 15 minutu, kontinua ho formasaun ba sarani sira, nomos konfesa hotu taka ho misa.

Reportajen: Joaninha Belo
Editor: Ekipa STL

LEAVE A REPLY

Please enter your comment!
Please enter your name here