DILI, STLNEWS.co – Atu selebra loron restaurasaun independensia Timor Leste loron 20 fulan Maiu ba dala 20, tanba nee Sentru Juventude Komoro iha inisiativa kria amizade entre joven sira liu husi desportu, hanesan jogu futebol salaun ba joven sira iha Postu Administrativu Dom Aleixo.
Lia hirak nee hatoo husi Diretor Sentru Juventude Komoro, Zito Izodoru Viegas ba STL iha Sede Postu Administrativu Nain Feto, Dili, Kuarta nee (27/04/2022).
“Liga ba selebrasaun loron boot loron 20 fulan Maiu Sentru Juventude Komoro iha atividade importante ida, mak oinsa atu kria amizade entre joven sira, ita koalia konaba kria amizade mak sentru juventude halao atividade ida ba iha desportu liu liu ba jogu futebol salaun,” tenik nia.
Nia dehan, husi atividade nee oinsa mak bele hametin liu tan relasaun entre joven sira, nee mak agora daudaun atividade nee lao hela.
Nia informa, atividade nee halao deit ba juventude sira neebe mak pertense iha Postu Admnistrativu Dom Aleixo, i atividade desportu konaba jogu neebe mak sentru organiza sei termina iha loron 20 fulan Maiu liga ba loron restaurasaun loron 20 fulan Maiu nian.
Alende nee sira hetan ona kontaktu husi Sekretariu Estadu Juventude Desportu (SEJD) iha mos atividade nasional liga ba iha loron 20 fulan Maiu nian, liu liu desportu komunitaria neebe atu prepara oinsa halo animasaun ba iha komunidade iha Dili laran, nee mak liga ba oinsa prepara bua para ema bele sae bua iha loron 20 fulan Maiu.
Iha sorin seluk, Joven Antonio Freitas hatete, inisiativa neebe mak Sentru Juventu Komoro realiza diak tebes.
(mar)
