SEPS – Parseiru Prepara Aihan Ba Munisipiu

Sekretariu Estadu Protesaun Sivil (SEPS), Joaquim Gusmao Soares. (Foto: STL/Natalina Lopes)

DILI, STLNEWS.co – Sekretariu Estadu Protesaun Sivil (SEPS), hamutuk ho parseiru sira hanesan WFP, kompania Jacinto, Kompania Leader, CLN no seluk tan, prepara aihan ho material sira ba Munisipiu 12 lainklui RAEOA, bainhira mosu dezastre naturais.

Lia hirak nee hatoo husi Sekretariu Estadu Protesaun Sivil (SEPS), Joaquim Gusmao Soares liu husi diskursu, iha fatin Protesaun Sivil Caicoli, Dili, Kinta (17/12/2020).

“Atu desloka sasan sira neebe hetan ajuda husi WFP ho osan cincuenta mil dolar (US$ 50.000), hodi bele aluga kareta tula sasan sira nee ba munisipiu ida-idak hodi bele rai armajen, para preparasaun karik akontese dezastre iha neeba, ba tinan ida nee, ita hotu hatene katak, atu hasoru mudansa klimatika hanesan fenomena el nino ida neebe maka udan sei tau makaas liu fali udan bain-bain no tau normal nee,” dehan nia.

Nia dehan, iha loron 8 fulan Dezembru hasoru tiha ona inundasaun iha Suai Malibaka, aldeia rua maka afetadu
iha umakain hamutuk 28.

Depois iha fatin balun neebe akontese anin boot no akontese mos ai monu makaas, anin subu uma, horiseik mos iha aeroportu Suai nee bee komesa alastra ona ba Same.

“Ita komesa senti ona katak, mudansa klimatika neebe maka akontese iha mundu tomak ita konsente ona ninian impaktu nee mai iha ita nia rai, ita tenke preparadu ba ida nee, aprende ba iha ita nia dezastre naturais neebe maka akontese fulan Marsu liu ba neebe maka boot tebe-tebes,” katak nia.*

Reportajen: Natalina Lopes
Editora: Carme Ximenes

LEAVE A REPLY

Please enter your comment!
Please enter your name here