DILI, STLNEWS.co – Relasiona ho Komandante Jeral (Komjer) Polisia Nasional Timor Leste foun, mosu duvidas iha sosiedade sira nia leet, inklui mos Jurista Timor balu no lamenta ho Komjer foun nee.
“Hau pesoalmente lamenta konaba nomeasaun Komjer foun, tanba ita haree Komjer foun nia background uluk nia komandante munisipiu Dili, nia la hatudu prestasaun servisu neebe diak, mas pelu kontrariu,” dehan Jurista Sergio Dias Quintas ba STL iha TDD, Kinta nee (16/03/2023).
Nia sublinha, populasaun neebe iha Dili hatene katak, detidu neebe mate iha sela Kaikoli nee iha Komjer foun nia tempu.
Tanba nee, husu atu nomeia Komjer foun pelu menus haree ba nia rezultadu husi prestasaun servisu neebe nia halo ona, hodi afeta ba seguransa publiku ida neebe seguru.
Jurista konsidera, laos nomeia fali ema neebe indireita envolve fali kazu ruma iha sosiedade, tanba ofisial PNTL foun barak mak potensia atu tur iha fatin refere.
Tanba nee, la ho kuidadu hodi hili figura Komjer, mak bainhira nia asumi nia knaar sei la halo buat barak too nia mandatu hotu.
Iha fatin ketak, Akademiku UNTL, Mario Nunes dehan, husu entidade sira haree didiak molok hili PNTL ida sai hanesan Komjer.
“Hau hanoin presiza haree didiak antes nomeia, hau fira katak Komjer neebe foun sei hetan konfiansa hodi halao knaar ho diak, dehan nia.
Nia akresenta, ema barak mak sei kestiona ho Komjer foun, tanba nee parte sira presiza haree didiak fali, atu bele tetu hamutuk hodi foti desizaun ida neebe loos.
(ter)
