Serka Sanitaria Estranjeiru Tama TL, Patrocino: Governu Inkonsistensia

Deputadu Bankada CNRT, Patrocino Fernandes. (Foto: Espesial)

DILI, STLNEWS.co – Deputadu Bankada CNRT, Patrocino konsidera governu hatudu inkonsistensia no inkapasidade iha koordenasaun, tanba iha ambitu serka sanitaria governu autoriza ema estranjeiru tama Timor Leste ho aviaun Euroatlantic Airways.

“Relasiona ho governu autoriza ema husi estranjeiru tama mai iha ambitu implementasaun konfinamentu ka serka sanitaria (SS) neebe governu rasik impoin, nee hatudu governu nia inkonsistensia no mos inkapasidade de koordenasaun entre membru governu sira hodi bele atua situasaun iha SS nia laran”, dehan Patrocino Fernandes ba STL, liu husi telefone, Kinta (18/03/2021).

Nia dehan, haree ba kestaun nee hamosu lamentasaun husi publiku tanba sente injustisa. I ema bele sente iha diskriminasaun husi governu ba populasaun. Nuudar bankada opozisaun sira nota mak governu iha situasaun paniku nia laran, nunee membru governu ida-idak halo nia atusaun la kondus ho regras sira neebe impoin ona, no sira nota katak membru governu sira dezorientadu iha implementasaun SS nee rasik.

Nunee tuir nia, governu defisil loos atu hetan politika ruma neebe diak hodi responde ba preokupasaun publiku liga ba implementasaun SS neebe lori konsekuensia hanesan sasan bazika folin sae makas, menus estok aihan iha munisipiu sira tanba laiha movimentu transporte, problema estudante sira husi munisipiu neebe kost iha Dili ke presiza osan no aihan, motoristas transporte publik lakon rendimentu no mos vendedores kiik sira lakon rendimentu.

Tuir deputadu nee katak, buat sira nee hotu rekere governu nia intervensaun hodi fo solusaun maibe laiha asaun konkreta ruma husi governu, hodi bele sai nuudar sasukat katak governu seriu duni halo prevensaun ba covid no tau atensaun ba konsekuensia sira husi impozisaun SS.

Iha parte seluk Deputadu Bankada Fretilin, Dario Madeira hatete, haree ba Governu implementa serka sanitaria (SS) iha munisipiu Dili agora alarga tan ona iha Munisipiu Baucau no Viqueque, maibe realidade neebe mak iha oras nee dadaun ladun iha efetividade, tanba kontrola iha Dili sei menus tebes. Iha semana ida liu iha minisipiu Dili, haree Dili laran sepi, maibe agora iha fatin balu komesa halibur malu, tanba nee presiza atensaun.

“Serka sanitaria neebe impelementa nee atu dehan ladun efetivu, tanba impelementa tiha SS iha sidade, depois ema labele tama sai sidade Dili, depois autoriza estranjeiru tama mai no sai, tanba hau koalia ladun efetivu ba SS”, lamenta Dario.*

Reportajen: Guilhermina Franco
Editor: Ekipa STL

LEAVE A REPLY

Please enter your comment!
Please enter your name here