Serka Sanitaria, Funsionariu CFJJ Kontinua Halao Servisu

Diretor Sentru Formasaun Juridiku i Judisiariu, Antonino Goncalves. (Foto: STL/Terezinha de Deus)

DILI, STLNEWS.co – Serka Sanitaria neebe halo ema barak la halao servisu, maibe funsionariu Sentru Formasaun Juridiku i Judisiariu (CFJJ-sigla Portuguese), kontinua halao servisu, hodi atende konaba kandidatu sira neebe hatama dokumentus iha sentru formasaun.

“Ami iha nee prinsipiu atu halo rutina, maibe ema uituan deit, tanba nee muda fali deit mak ema hanesan sira departementu kooperasaun la iha atividade, mai ajuda fali departementu formasaun, tanba loron loron simu hela deit ema neebe hatama dokumentus ba prokurador nian,” dehan Diretor Sentru Formasaun Juridiku i Judisiariu, Antonino Goncalves ba STL, iha nia knaar fatin Caicoli, Segunda (22/03/2021).

Nia hatutan, departementu biblioteka ajuda ba iha administrasaun, no funsionariu rua nulu resin. Maibe ba oin sira sei halo turnu para balu bele deskansa uituan.

Maske funsionariu sira nee halao servisu iha serka sanitaria nia laran, maibe sira rasik aranja sira nia maskra, no bee tau iha portaun oin, atu ema neebe tama sai hodi fase liman.

Hatan konaba teste ba kandidatu sira sei presiza tan formador balu ka lae nia esplika, agora dadaun professor rua deit la too, no propoin mai tan juiz ida para juiz tolu, prokurador ida, advogadu rua, no psikolog ida atu fo ezame ba kandidatu sira. Ho nunee konaba psikolog haruka ona proposta malae neebe husi Portugal, nia mos halao knaar iha nee kleur ona, tanba nee nia sei mai hodi prepara nia materia atu fo ezame psikolojia ba kandidatu sira neebe passa iha ezame oral. Esplika tan halo ona kontaktu no haruka ona termu referensia ba Ministeriu Justisa, tanba Uniaun Europeia no UNDP sira mos iha interese atu apoiu ba ida nee.

Hatan konaba formasaun komplementar ba juiz sira, nia dehan sei hahu fali iha fulan Abril loron lima too loron hitu, maibe agora sei para lai.

Tuir observasaun STL nian katak, iha sentru formasaun kuaze sira halao servisu barak liu, hodi atende konaba dokumentus neebe kandidatu sira hatama.

Maske nunee iha kandidatu ba juiz nee, halo selesaun hotu ona ba dokumentus sira, no agora atende hela kandidatu ba prokurador nian.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here