Serka Sanitaria, Simu Pedidu Liu Husi E-mail

Diretor Ezekutivu SERVE, Florencio Sanches. (Foto: STL/Jacinta Sequeira)

DILI, STLNEWS.co – Iha ambitu implementasaun serka sanitaria, neebe estende tan too loron 2 de Abril iha kapital Dili, nunee SERVE sei simu pedidu husi emprezariu sira liu husi e-mail neebe mak iha.

Tuir Diretor Ezekutivu SERVE, Florencio Sanches, dehan, los duni katak, ho serka sanitaria neebe sei estende too dia 2 Abril, atu nunee ema hotu bele halo prevensaun ba surtu Covid-19, neebe kada loron numeru pozitivu kontinua aumenta bebeik, tanba nee evita halibur malu, diak liu atende emprezariu sira liu husi e-mail neebe mak iha.

“Agora dadaun ami atu hasoru malu, para bele implementa fali regras foun ba hahu ohin too dia 2 fulan Abril ninia, neebe liu husi media ida nee bele fo sai informasaun ba ita nian kliente sira, ou emprezariu sira katak, fo hela pedidu ruma karik bele liu husi e-mail 12 neebe SERVE prepara ona, atu nunee labele hasoru malu, maibe prosesamentu husi SERVE lao nafatin, liu husi media eletroniku. Agora dadaun 10 oras ami sei hasoru malu, para bele koalia asuntu nee, aproveita iha oportunidade ida nee, ho serka sanitaria ida nee, SERVE simu pedidu pedidu husi emprezariu liu husi e-mail deit,” dehan Florencio ba STL iha nia knar fatin SERVE, Tersa (16/03/2021).

Florencio hatutan, SERVE simu pedidu liu husi eletroniku deit, atu nunee bele fasilita emprezariu sira. Segundu kumpri ona regras estadu emerjensia ba Covid-19 ninia, tanba nee sira sei hamutuk halo enkontru ida, para bele desidi atende maluk emprezariu sira liu husi eletroniku neebe mak iha.

Iha fatin seluk Martinho Maia de Jesus, hanesan nain ba Kompania Marde Unip.Lda, hatete, diak liu ho serka sanitaria ida nee, parte SERVE nian simu pedidu ruma tenke liu husi e-mail deit, ho nunee evita ema labele halibur malu.*

Reportajen: Jacinta Sequeira/Blandina Mauno
Editora: Domingas Gomes

LEAVE A REPLY

Please enter your comment!
Please enter your name here