DILI, STLNEWS.co – Programa sesta bazika, subsidiu US$ 200 no programa uma naroman ba povu, nee programa governu nian, osan mai husi estadu, laos husi partidu politiku.
Kestaun nee hatoo husi Kordenador Asosiasaun HAK, Sabino Mendonca ba jornalista iha nia knaar fatin Farol, Kuarta nee (29/03/2023).
Nia hatete, agora tinan politiku, partidu politiku sira uza oportunidade hodi halo kampanha, nunee hetan konfiansa husi povu, maibe programa sira nee governu nia, laos partidu politiku nia.
“Koalia konaba sesta bazika nee estadu nian, laos partidu ida nia. Povu matenek ona, ita haree dala barak ema uza laos sesta bazika deit, maibe balun mos uza lei pensaun vitalisia hodi kampanha, nee hanesan meius atu konvense povu atu bele hetan fiar, nee hanesan promesa falsu,” katak nia.
Koordenador mos haktuir, programa sesta bazika mos laiha benefisiu ba povu, tanba nee partidu politiku sira iha direitu atu koalia iha kampanha, maibe lo-loos sesta bazika nee estadu nia, laos partidu ida nia, povu presiza hatene ida nee.
“Povu labele influensia katak sesta bazika nee partidu ida nia, hodi influensia buka votus, se deit mak kaer governu hodi implementa, nee estadu nia, laos partidu ida nia, no partidu politiku sira uza hanesan oportunidade atu halo promesa, nee hanesan meius atu konvense povu sira hodi bele fiar ba sira, nee normal,” katak nia.
Nia hatutan, povu tenki konsiente atu hili, no povu mos tenki hatene katak sesta bazika mos laos partidu ida nia, maibe nee estadu nia.
Nunee mos Diretor Ezekutivu Asia Justice And Rights (AJAR), Jose Luis De Oliveira hatete, sesta bazika, uma naroman ba povu, subsidiu US$ 200, partidu politiku labele uza sira nee sai hanesan materia kampanha.
“Labele uza sai objetivu atu hetan votus, se deit mak kaer governu, tenki dezenvolve programa neebe fo benefisiu ba povu, programa nee mak halo mudansa ba povu nia moris,” katak nia.
Nia hatutan, povu hili sai lideransa atu haree povu nia moris, no se deit mak kaer governu nia programa mak atu hadia povu nia moris, tanba nee labele uza programa sira sai materia kampanha.
(eme)
