Setembru Nakroma 2 Too TL

Prezidente APORTIL, Flavio Cardoso Neves. (Foto: Madalena Horta)

DILI, STLNEWS.co – Prosesu ba Ro Nakroma 2 lao diak, fiar katak Novembru 2021 nia bele too ona TL hodi halo operasaun husi Dili ba too Lospalos, tanba nee agora governu prepara ona tripulante sira ba Nakroma 2.

Liu husi intervista Prezidente Aportil, Flavio Cardoso Neves hateten, Nakroma 2 sei too iha TL iha fulan Novembru 2021, tanba nee maka hahu Marsu ou Abril 2021, governu sei servisu hamutuk ho SEPFOPE hodi prepara Timor oan, hodi ba tuir formasaun iha Alemania, oinsa Nakroma 2 nee Timor oan bele jere rasik, tan nee governu sei prepara ema lubuk ida balun servisu hanesan tripulante no balun servisu iha Nakroma laran.

“Hau hanoin prosesu Nakroma 2 nee lao diak tebes, tan nee ita sei prepara Timor oan, oinsa atu ba tuir formasaun iha Alemania, depois maka sira sei mai hamutuk ho Nakroma 2, tanba tuir planu governu Alemania maka sei lori mai entrega ba Governu TL, tan nee Timor oan sira neebe ba tuir formasaun nee mos bele mai hamutuk,” dehan Prezidente Aportil Flavio Cardoso Neves ba STL, Segunda (28/12/2020) iha nia knaar fatin Portu Dili.

Nia mos afirma liu tan katak, Nakroma 2 mai sei kaer husi parseiru sira, no Timor oan nafatin halo akompaniamentu, karik Timor oan bele ona atu sai tripulante maka, parseiru sira nee sei fila, tanba Nakroma 2 too agora sei kaer husi parseiru sira, tan nee governu buka meus atu Timor oan maka bele lori Nakroma 2.

Tuir nia katak, orsamentu ba sosa nakroma II nee, kuaze 16.5 ital milloens euro, apoiu husi Governu Alemania 6 Milloens, no TL nian maka 10 ital Milloens, total hamutuk maka 16.5 ital Milloens.

Iha parte seluk reprezentante povu iha uma fukun Parlamentu Nasional, Deputadu Antonio da Conceição hatutan, prosesu Nakroma 2 nee lao kleur tiha ona, tanba nee fiar katak tinan 2021 nee nia bele too iha TL hodi apoiu Nakroma 1, tanba durante tinan 10 resin ona Nakroma 1 maka halo viazen Dili-Oecusse no Dili-Atauro, fiar katak Nakroma 2 sei mai duni TL hodi fasilita komunidade sira neebe maka hela iha rai ketan. *

Reportajen: Madalena Horta/Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here