Setor Agrikultura Mak Xave Ba Dezenvolvimentu TL

DILI, STLNEWS.co – Relasiona ho setor agrikultura hanesan xave importante hodi halo dezenvolvimentu iha Timor Leste (TL), tanba husi setor refere bele aumenta kresimentu ekonomiku iha rai laran.

“Esperiensia barak mak ita haree, liu-liu iha nasaun avansadu sira, ema neebe hanesan moris iha setor agrikultura ema nee mak sai milhonariu no misionariu, signifika setor refere bele dezenvolvimentu ekonomiku iha rai laran,” hatete peskizador iha setor Agrikutura no Kooperativa, Apolinario dos Santos ba STL iha nia residensia Taibesi, Kuarta (31/01/2023).

Nia hatete, setor agrikultura nee sai pilar importante iha nasaun ida, liu-liu nasaun Timor Leste, tanba nee mak hanesan orgaun estadu presiza tau prioridade.

Tanba haree husi aspetu ekonomiku ba dezenvolvimentu nasaun nian, tenki liu husi setor importante sira mak setor agrikultura no pekuaria, nee setor sira neebe bele kria dezenvolvimentu ekonomiku iha rai laran.

“Ita iha rai neebe luan, maibe ho toos neebe kiik, kompara fali ho nasaun sira seluk, ho rai neebe boot, presiza halo toos neebe boot, mak agriculture and horticulture camp, signifika husi setor ida nee bele loke dezenvolvimentu ekonomiku neebe vibrante, hodi kria empregu rasik iha rai laran,” nia sublina.

Nia dehan, husi politika oinsa prioritiza setor agrikultura mak presiza tau orsamentu liu 2,1% husi Orsamentu Jeral Estadu (OJE), presiza aumenta too 10%, tanba investor sira neebe influensia hodi mai vizita TL, atu haree hotu produtu esportasaun, maibe durante nee seidauk halo, no programa espozisaun sira sei lentu hotu.

Entertantu, Dosente Permanente iha UNTL, area Politika Publika, Victor Soares hatete, agrikultura mak atividade hanesan kuda to’os ka hakiak animal hodi kria ai haan ka medisina, no agrikultura mak sai hun no abut ba ema hotu, liu-liu ba dezenvolvimentu iha rai laran.

Tanba iha mundu setor agrikultura hahu tinan 10.000 liu ba iha area naran Crescente Fertil, neebe ohin loron konhese nudar nasaun Irak, Syria, Turquia no Egito, dahuluk ema kuda trigu no cevada, maibe iha tempu neeba sira mos hetan aihoris fuik. Iha tempu neeba karik ema hahu ho setor agrikultura tanba iha mudansa ba klimatika no mudansa rai.

Ho agrikultura ema bele han barak liu se kompara ho buka ai haan fuik, no husi agrikuktura ema barak bele hadia nia moris, tanba nee setor agrikuktura nee nudar pilar importante iha nasaun Timor Leste, presiza fo prioridade.

Nia afima, IX Governu Konstitusionál presiza halo definisaun ba planu esratejiku oinsa bele fo prioridade ba setor agrikultura ida iha tempu naruk, nunee bele kontinua dezenvolve no halo produsaun ho forma ida atu bele asegura kapasidade alimentar ba ema nia moris.

(EST/1)

LEAVE A REPLY

Please enter your comment!
Please enter your name here