Situasaun Neebe TL Hasoru, Presiza Halo Refleksaun Klean

DILI, STLNEWS.co – Prezidente Republika (PR) Francisco Guterres Lú Olo hatete, ho situasaun neebe mak Timor leste hasoru oras nee ema hotu presiza halo refleksaun.

PR hatutan, dezastre natural neebe akontese iha fulan kotuk 4 de Abril, udan boot rezulta bee sae makaas no provoka inundasaun iha munisipiu Dili no mos iha munisípiu seluk. Ho inundasaun no ho forsa bee nian, infraestrutura barak mak monu no estraga total, hanesan ema nia uma, edifisiu publiku no infraestrutura bazika publika barak hanesan dalan no pontes.

Ema barak lakon sira nia uma no sasan tomak, no too ohin loron seidauk iha uma diak ida hodi fila fali ba. Triste liu tan, sidadaun mate no lakon, hamutuk nain haat nulu resin ida.

Xefe Estadu hatutan nuudar nasaun no povu ida, iha ona esperiensia naruk ida hodi hasoru dezafiu boot no ho brani, ho matenek, ho sakrifísiu no dedikasaun tomak, uza rekursus neebe iha hodi muda situasaun. Iha tempu funu nian, uza rekursus neebe disponível iha momentu neeba, kilat balun husi tempu Portuges, kilat no kilat musan neebe kaptura husi inimigu, radiu kiikoan neebe konsege hetan hodi rona notísia husi rai-liur, hakerek surat ho lian portuges hodi inimigu labele deteta, tanba meiu komunikasaun seluk laiha. no dala barak lori fulan ba fulan atu too iha nia destinatariu. Maibe, dalan sira nee hotu mak Timor uza hodi alkansa nia objetivu final, ukun rasik an.

“Ohin ita tenke hateke ba situasaun neebe ita hasoru no halo refleksaun klean ida kona-ba ita-nia pais neebe ita harii dadaun. Dezafiu sira neebe ita hasoru, hanesan dezafiu politiku, sosial, pandemia, dezastre natural labele trava ka impede ita hodi nafatin kontinua ita-nia eroi no eroina sira-nia mehi hodi harii sosiedade ida neebe livre, demokratika no justa. Sosiedade ida neebe sidadaun sira moris ho haksolok. Ao kontrariu, iha adversidade nia laran mak ita tenke matenek hodi analiza no diskute dalan neebe ita lao hela, identika no asume sala neebe ita halo ona no ho responsabilidade buka meius atu hadiak buat neebe tenke hadiak no halo foun buat neebe importante hodi dezenvolvimentu bele lao nafatin ho kualidade no sustentabilidade. Tempu agora no ba oin sei nafatin dezafia ita-nia kapasidade hanoin no halo ho diak sei laiha milagre, maibe hamutuk ita bele hadiak no haburas.” hatete PR Lú Olo ba jornalista liu husi mensajen 20 de Maiu iha Palasiu Prezidente, Bairru-Pite, Kinta (20/05/2021).

Aman nasaun nee hatutan, ohin loron iha ferramentas barak liu hodi uza.
Siensia no teknolojia iha mundu tomak iha avansus neebe signifikativu tebes no Timor iha rekursus umanus barak. Tinan ba tinan Governu investe hela iha rekursus umanus hodi garante bolsa estudu ba sidadaun barak, hodi sira bele buka matenek iha universidade sira iha rai-laran no iha rai-liur hodi hasai espesializasaun iha area neebe importante ba dezenvolvimentu pais.

“Retornu neebe ita hetan husi investimentu ida nee mak ohin loron ita iha kuadrus barak formadu iha area oin-oin, ho experiensia neebe sira hetan iha pais sira seluk. Sera ke rekursus umanus neebe ita prepara ona, iha kondisaun hodi aplika sira-nia espesialidade iha prosesu dezenvolvimentu nian? Ka ita presiza tan kondisaun sira seluk, liu liu transmisaun valores neebe lori ita too mai agora? Ida nee refleksaun importante ida neebe governante sira tenke halo ho onestidade. Ita hotu nia kontribuisaun importante ba ita-nia pais.” katak nia.

Ho refleksaun ida nee, bele hateke ba oin no haree ba situasaun ida nee hanesan oportunidade ida hodi halo reformas estruturais nesesarias iha pais, laiha dalan seluk.

“Ita tenke hatene uza siensia no teknolojia, rekursus umanus no finanseirus neebe ita iha hanesan baze atu define no aprova politikas publikas, hanesan ordenamentu territoriu, abitasaun publika, saude publika, asesu ba bee-moos no saneamentu, edukasaun ho kualidade, asesu ba informasaun, asesu ba internet no forma komunikasaun seluk, no seluk tan. Ba oin ita sei hasoru pandemia sira seluk no dezastres naturais iha tempu neebe ita la espera. Tanba nee ita nia rekursus umanus no estruturas fizikas tenke preparadu no solidu hodi hasoru dezastre sira nee. Ita-nia populasaun tenke iha serteza katak iha ita-nia pais iha estruturas neebe adekuadu no preparadu hodi antesipa kualker situasaun kalamidade no bele fo asistensia imediata no adekuada ba sidadaun sira hotu bainhira presiza, tanba moras ka tanba hetan dezastre natural ruma.” katak nia.

Urjente tebes ba Governu hodi uza kuadru tekniku sira ho apoiu husi parseiru dezenvolvimentu hodi identifika zonas risku nian. Importante mos katak define area neebe adekuada ba agrikultura no pekuaria no investe makaas hodi moderniza no hasae produsaun interna. Ho nunee bele garante empregu ba ema barak no bele mos garante seguransa alimentar.

“Ho dezastres naturais neebe tinan-tinan ita hasoru, Governu tenke iha korajen hodi asumi sala neebe halo ona no korrije ho apoiu husi teknolojia no siensia. Ida nee hanesan oportunidade ida hodi Governu aproveita hodi halo ordenamentu territoriu ida neebe integradu, seriu no seguru. Define lolos fatin ba abitasaun, fatin ba agrikultura no pekuaria, zonas komersiais no industriais, area ba adminsitrasaun no edifisius publikus, zonas de lazer hanesan jardin no parke publiku sira, no seluk tan hodi promove dezenvolvimentu fiziku ida neebe loke dalan ba sidadaun hotu moris iha armonia no seguransa laran.” dehan nia.

Bainhira ita kontinua nafatin halo konstrusaun oin-oin iha bee dalan, hanesan iha mota ninin, iha area Tasi-Tolu nian, no seluk tan, ka nafatin la respeita natureza, mak tinan-tinan sei hasoru dezastre hanesan no at liu tan, no sei lakon ema nia vida beibeik.

“Fenomenu natural repete hela deit. Karik ita la hatene hasai lisaun, ita nunka bele halo diak. Diak liu mak ita tau hamutuk ida-idak nia matenek no kbiit rasik, no hamutuk ita harii kondisaun hodi ita hadiak liu tan ita-nia moris diak no hateke ba oin. Laos haree ba ohin ka aban deit, maibe ba oin nafatin ho serteza loloos ba ita-nia povu nia moris-diak.” nia hakotu.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

MAP – FAO Identifika Suku 3 Afetadu Malnutrisaun

DILI, STLNEWS.co - Ministeriu Agrikultura e Peskas (MAP) servisu hamutuk ho Food and Agriculture Organization of the United Nations (FAO), nomos ministeriu relevante identifika...

Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun; EP2

STLNEWS.co – Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun • EPISODE 2: Drama Stop Bullying https://youtu.be/GDfSwKsB-gQ • PSA Vasina https://youtu.be/YnwLmcGBFOs Ministério dos Assuntos Parlamentares...

Ezekusaun Orsamentu Ajensia TIC Atinji 25%

DILI, STLNEWS.co - Diretor Ezekutivu Ajensia Teknolojia Informasaun no Komunikasaun (IP-TIC), Roberto Caetano aprezenta relatoriu ezekusaun orsamentu ajensia nian ba Primeiru Ministru Taur Matan...
%d bloggers like this: