DILI, STLNEWS.co – Koordenador Movimentu Progresista Timor Leste (KMPTL) husu ba Polisia Nasional Timor Leste (PNTL) liu-liu parte Polisia Nasional Servisu Investigasaun Kriminal (PNSIK), atu fo sai rezultadu investigasaun husi insendiu neebe akontese iha edifisiu Ministeriu Administrasaun Estatal (MAE), iha loron (23/3/2023) oras 23:40.
“Husu ba PNTL parte investigasaun kriminal PNSIK atu fo sai rezultadu investigasaun insendiu neebe akontese iha edifisiu MAE foin lalais nee,” dehan Rogerio da Cruz ba STL liu husi telefone, Dili, Tersa nee (04/04/2023).
Nia haktuir, antes nee Departamentu Investigasaun Kriminal (DIK-PNTL) foti ona sidadaun nain 11 husi Rejiaun Autonomo Espesial Oekusi Ambeno (RAEOA) hodi halo identifikasaun, inklui mos pesoal seguransa sivil neebe destaka iha edefisiu MAE.
Iha fatin ketak, Komandante Komando Munisipiu Dili, Superintendente Xefi Natersia Martins informa, konaba insendiu neebe akontese iha edifisiu MAE, servisu kriminal nasional bele responde ida nee.
“Relasiona ho insendiu neebe akontese iha MAE, servisu kriminal nasional mak halo atendimentu ba kazu ida nee, tanba sira mak halo atendimentu ba kazu ida nee,” hatete Komandante Munisipiu Dili nee.
Entretantu, tuir informasaun insendiu nee rasik bainhira akontese rezulta sasan barak mak ahi han mutuk, tanba akontese iha cobby house MAE nian neebe sai hanesan fatin neebe mak akumula diresaun ka unidade lima MAE nian, hanesan Unidade Asesoria Teknika (UAT), Diresaun Nasional Organizasaun Urbana (DNOU), Inspesaun Jerál MAE (IJMAE), Diresaun Rekursu Umanu (DRU), Unidade Protokolu Komunikasaun Informasaun Externa (UPKIX).
(cei)
