Sosiedade Seidauk Sente Normas Husi EE

Jurista Sergio Dias Quintas. (Foto: STL/Terezinha de Deus)

DILI, STLNEWS.co – Relasiona ho estadu de emerjensia ikus nee, ligasaun ho Covid-19 hatudu katak sosiedade seidauk sente, tanba la iha normas balu atu regula sira.

Lia hirak nee, hatoo husi Jurista Sergio Dias Quintas ba STL, iha TDD Sexta, (09/10/2020).

“Estadu la iha seriedade tuir artigu 24 numeru dois, konaba lei respektiva sira nee, tanba estadu so apenas dekreta estadu emerjensia, maibe la iha meius ou normas ruma bele limite halo restrisaun ba direitu sidadaun nian, so apenas dekreta deit estadu emerjensia maibe, ba kondisaun estadu emerjensia sosiedade la sente, hanesan situasaun babain,” dehan nia.

Sergio hatutan, tanba nee hatudu katak estadu la seriedade ba lei estadu emerjensia nee, maibe se karik lei ka norma ruma neebe limite liberdade ema nian, nee diak liu tan.

Esplika tan, maske moras Covid-19 seidauk ejiste makas iha timor, estadu presija halo normas ruma atu foka sai ba iha publiku hanesan estadu emerjensia antes nee, atu fase liman lao ho distansia sosial atu sosiedade hatene.

Maibe agora dadaun estadu emerjensia neebe iha, sosiedade hatene deit estadu emerjensia sei ejiste, maibe la iha normas ruma, neebe sosiedade hatene ida nee mak sai hanesan problema.
Sergio dehan, se iha ona norma ruma karik, bele publika atu sosiedade sira hatene, ezemplu hanesan iha fronteria limite ema nia atividade atu halo vizita, regra tenke iha, se regra nee iha mas too agora sosiedade sira seidauk hatene, tanba nee presija halo sensibilizasaun, bazeia ba artigu 24 husi numeru ida nian.

Tanba nee nia hanoin governu dekreta deit estadu emerjensia, maibe la iha normas ida atu sosiedade hatene konaba norma nee maka uja ba estadu emerjensia nian. Maibe se iha mos governu la publika, atu sosiedade hatene, kompara ho estadu emerjensia antes nee.

Hanesan jurista hatoo nia rekomendasaun katak, se bele karik estadu kria normas ida iha estadu emerjensia nee atu sosiedade hatene, bele eduka sosiedade. Tanba too agora nivel mundial pandemia nee seidauk iha vasina, tanba nee tenke kuidadu krie normas neebe diak ba sosiedade.
Nunee to iha tempu neebe enfrenta situasaun grave liu, ita iha ona kondisaun, em termus de ligislasaun sira nee.

Iha fatin ketak, Akademika Sebastiao De Deus dehan, presija kria estadu emerjensia kontinua, atu evita pandemia tama iha timor.

“Hanoin presija implementa nafatin estadu emerjensia, atu prevene pandemia tama iha timor, dehan Nia.
Afirma tan, moras nee seidauk iha vasinasaun neebe lolos, tanba nee prevene antes, atu moras nee labele tama iha nasaun neebe kiik, ho nia rekursu humanus iha area saude nian la dun makas.” dehan nia.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here