Sosiedade Sivil Husu Auditoria Ba Distribuisaun Sesta Bazika

DILI, STLNEWS.co – Organizasaun Sosiedade Sivil husu IX Governu atu halo auditoria ba programa distribuisaun sesta bazika neebe implementa husi VIII Governu Konstitusional, tanba mosu iregularidade barak.

Diretor Ezekutivu Forum ONG Timor Leste (FONGTIL), Valentin da Costa Pinto hateten, governu presiza halo auditoria, tanba iha distribuisaun sesta bazika populasaun barak kestiona konaba montante orsamentu no kualidade produtu neebe mak kompanhia distribui ba populasaun sira.

“Auditoria ba distribuisaun programa sesta bazika nee importante tebes, tanba uza osan estadu, bainhira detekta buat ruma neebe la diak, no ema balun tenki responsabiliza ba ida nee, tenki prosesa nia, no iha futuru mai tenki hadia ida nee,” dehan Valentin da Costa Pinto ba jornalista sira iha nia knaar fatin, Kuarta (21/06/2023).

Nia hatutan, iha prosesu distribuisaun sesta bazika nee mosu lamentasoens oin-oin relasiona ho kuantidade orsamentu no kualidade produtu, tanba orsamentu neebe preve ho montante US$ 50, maibe ai haan neebe kompanhia fahe nia folin la too osan nee, no ai haan barak iis, maibe orgaun kompetente ladun halo servisu diak atu halo kontrolu iha prosesu distribuisaun.

Diretor Ezekutivu nee mos husu IX Governu atu buka solusaun ba benefisiariu sira neebe seidauk simu sira nian direitu.

(alb)

LEAVE A REPLY

Please enter your comment!
Please enter your name here