Sosiedade Sivil Husu PolTranz Hapara Operasaun Dokumentu Iha Situasaun EE

DILI, STLNEWS.co – Diretor Ezekutivu Luta Hamutuk (LH), Jose Alves da Costa husu Polisia Nasional Timor Leste (PNTL) liu – liu Unidade Polisia Tranzitu (PolTranz), atu hapara operasaun dokumentus kareta ho motor iha situasaun Estadu Emerjensia (EE).

Diretor nee dehan, nia parte lamenta no kritika Polisia Nasional Timor Leste (PNTL) liu – liu unidade tranzitu, tanba halo servisu tuir sira nia hakarak durante tinan ida resin Timor Leste hasoru pandemia Covid-19.

“Konfinamentu Obrigatotiu (KO) no Serka Sanitaria (SS) kada semana – semana governu kontinua estende, nunee la iha tempu ba ita nia sidadaun sira atu halo tratamentu ba sira nia dokumentus, tanba nee iha situasaun emerjensia diak liu fo livre total sidadaun sira neebe mak uza kareta ho motor neebe sira nia dokumentus invalidu hotu ona, nunee sira bele halo atividade ruma, tanba iha KO nee sidadaun sira atu buka moris mos araska, se mak atu ajuda sira,” dehan Jose liu husi telefone, Tersa (31/08/2021).

Tuir nia, governu mos fo sai ona katak, dokumentu kareta motor neebe invalidu ona, iha situasaun EE nee sei vale nafatin nunee PNTL liu husi Unidade Polisia Tranzitu atu labele halo pasa revista.

Nia mos hatutan, sistema servisu administrasaun publiku mos lao ladun diak, atendimentu lao ladun diak nunee halo ema barak baruk no atrazadu bainhira hakarak ba trata sira nia dokumentus ate dokumentu kareta, motor sira nee invalidu hotu.

Aleinde nee iha loron hirak liu ba Ministru Prezidensia Konsellu Ministru (MPKM), Fidelis Leite Magalhaes afirma ona katak, iha situasaun EE nee lisensa hotu – hotu no dokumentu kareta, motor inklui karta kondusaun ema nian neebe invalidu ona sei vale nafatin iha situasaun emerjensia nia laran.

“Durante periodu vijensia EE nian lisensa hotu – hotu iha autorizasaun, no atu administrativu sira seluk no dokumentus sira mantein validu la haree ba ninia validade prazu nian,” dehan nia.*

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 26 Setembru: Kazu Pozitivu 32 & Rekuperadu 83

DILI, STLNEWS.co - Sentru Integradu Jestaun Krize (SIJK) ohin relata kazu pozitivu iha ema nain 32 no rekuperadu hamutuk 117. "Kazu detetadu foun neebe relata ohin loron...

MTKI Loke Kompetisaun Pintura

DILI, STLNEWS.co - Ministeriu Turizmu Komersiu no Industria (MTKI), liu husi Diresaun Nasional Emprendismo ba Atividade Produtus Turistiku organiza kompetisaun pintura ba joven sira. Grupu...

Remata Nia Misaun Iha TL, Sitorus Despedida Ho WNI

DILI, STLNEWS.co – Embaixador Indonezia ba Timor Leste (TL), Sahat Sitorus ho nia espoza Bintang Vera C. Sitanggang, neebe durante tinan 4 ho balun...
%d bloggers like this: