SS Halo Estudante Barak Sofre Hamlaha

Abelito da Costa Doutel "Dimas". (Foto: STL/Efizenia da Costa)

DILI, STLNEWS.co – Relasiona ho implementasaun governu aplika serka sanitaria (SS) durante loron 10 nia laran iha Munisipiu Dili, halo estudante barak mak lamenta ho situasaun refere, tanba susar ba osan no susar atu hetan hahan husi familia sira iha foho.

“Tanba lockdown total no labele halo movimentasaun ba munisipiu, no munisipiu mos labele mai iha Dili. Implementasaun serka sanitaria hahu husi loron 7 fulan Março too loron 2 fulan abril, nee ami atu han saida los hodi aguenta moris, tanba nee ami lamenta tebes,” dehan estudante hanesan mos juventude, Abelito da Costa Doutel “Dimas” ba STL iha Tasitolu Dili, Sesta (19/03/2021).

Nia dehan, nuudar joven jerasional lamenta tebes ho implementasaun serka sanitaria iha Munisipiu Dili, neebe mak hapara hotu movimentasaun transporte publiku hodi implika ba komunidade no sosiedade sira atu buka moris, i mais pior ba estudante sira neebe mak hela iha kost.

Nia hatete, iha sorin seluk, sira mos la satisfas ho governu ninia implementasaun serka sanitaria ida nee, tanba governu hapara movimentasaun iha rai laran maibe nafatin fo biban ba estranjeiru sira tama liu husi aeroportu internasional Nicolau Lobatu nian.*

Reportajen: Efizenia da Costa
Editora: Domingas Gomes

LEAVE A REPLY

Please enter your comment!
Please enter your name here