STT-STL Moris Iha Presaun no Violensia

Serimonia Aniversariu STL ba dala 28, iha Oesindu Surikmas Dili Sabadu(06/02/2021). [Foto: STL)

DILI, STLNEWS.co – Durante okupasaun Indonezia nia laran Suara Timor-Timur (STT) no Suara Timor Lorosae (STL), ninia moris nakonu tebes ho presaun no violensia.

Dehan eis Sekretariu Estadu Defeza no Seguransa, Francisco Guterres, bainhira partisipa iha Serimonia Aniversariu STL ba dala 28, iha Oesindu Surikmas Dili Sabadu (06/02/2021).

“Istoria neebe maka nakonu ho violensia no presaun hanesan kareta ema sunu, uma mos rahun, tanba iha momentu neeba kareta nee importante tebes hodi fasilita jornalista sira nia aktividades durante nee,” dehan nia.

Nia husu ba jornalista sira, tenki hakerek buat neebe mak bele hakerek, no fo sai mak buat neebe bele fo sai ba publiku, tanba durante tinan naruk nee nia laran STT nee ninia historia nee ketak, agora dadaun nee ema barak haluhan tiha papel estrategia.

Nia haktuir, uluk jornalista barak tebes maka hamahon aan iha STT nia tempu, mais laiha ema ida atu koalia konaba durante sira nia servisu, neebe maka konaba Xanana nia intervista sira iha ailaran neeba.

“Hau mos hakarek artigu balun no halo shoot, mais laiha ema ida maka koalia konaba ida nee, kuandu iha ona tempu ukun aan hanesan nee sira dehan ami maka luta, mais iha situasaun difisil nee instituisaun jornalismu ida neebe maka moris, no fo nia espasu ba iha rezistensia ninia ukun aan nee maka STT-STL,” dehan nia.

CEO & Chairman STL Corp, Salvador J.X. Soares ho Deputadu husi Bankada Fretilin, David Diaz Ximenes Mandati. (Foto: STL)

Nia hatete, bainhira nia halo peskiza ba nia tempu uluk, konaba notisia sira nee tenki balansu no kontra rezistensia no notisia neebe iha kuaze hanesan mais nia la sura ba iha artigu sira neebe mak hakerek ona.

Nia mos husu ba funsionariu STL sira hotu atu servisu ho diak, iha fatin neebe maka loos no kredivel iha liuliu iha fatin nee.

“Tanba nee ita boot sira servisu iha STL nee, tenki fahe historia sira neebe mak iha durante okupasaun Indonezia nian mai too agora nee labele husik deit,” sujere nia.

Tanba uluk STT-STL nia moris nakonu ho presaun no sira mos sobrefika estrategia presaun ida no liu husi buat sira nee hotu sai hanesan valores ida neebe maka diak ba ema hotu, no presiza kaer metin tanba valor importante nee maka nee.

“Ita hotu hatene katak historia STT nian too ohin loron naran STL nee signifika sae mai nee ho lia loos, tanba nee mak bele kompleta dadauk tinan nee sae ona ba 28,” dehan nia.

Tanba Suara Timor-Timur (STT) nee mak sai tiha Suara Timor Lorosae (STL), signifika iha situasaun difisil neebe maka lori sai hanesan historia hodi koalia tutan ba ema hotu, tanba nee tenki halao profisaun nee ho diak.

Iha serimonia Aniversariu STL ba dala 28 nee mos, hetan partisipa husi Deputadu Bankada Fretilin, David Diaz Ximenes Mandati no Dosente Komunikasaun UNTL, Marcelino Magno.

Reportajen: Efizenia da Costa / Santina Castro
Editor: Carme Ximenes

LEAVE A REPLY

Please enter your comment!
Please enter your name here