Tama Ilegal Tenke Fo Sansaun

Xefe Estadu Falintil Forsa Defeza Timor Leste (F-FDTL), Maior Jeneral Lere Anan Timur, enkontru regular ho Prezidente Republika, iha Palasiu Prezidente Nicolau Lobato, Bairru Pite, Dili, Kuartu (09/09/2020).

DILI, STLNEWS.co – Husi loron ba loron ema sempre tama ilegal mai iha rai laran, tanba nee tenke fo sansaun ba sidadaun neebe kontra regra fronteira.

Xefe Estadu Falintil Forsa Defeza Timor Leste (F-FDTL), Maior Jeneral Lere Anan Timur hatoo kestaun nee, bainhira halo enkontru regular ho Prezidente Republika, iha Palasiu Prezidente Nicolau Lobato, Bairru Pite, Dili, Kuartu (09/09/2020).

“Lao ilegal nee kuaze loron loron tanba fronteira nee luan, ita nia oan sira neebe mak hasai sintu arte marsial viola bebeik, maibe ita nia forsa sira iha neeba kaer balun no balun halai fila. Tanba nee mak hau dehan ba Prezidente Republika katak sira neebe mak kaer mai ona karantina no karantina labele husik deit, maibe tenke fo sansaun tanba viola lina fronteira,” dehan Lere.

Jeneral fitun rua nee esplika, foin lalais membru arte marsial hamutuk 50 ou 60 mak tenta atu tama husi dalan illegal, maibe forsa sira kaer nain sanulu resin ou besik 20, restu halai fila, sira neebe kaer oras nee iha ona karantina.

“Karantina ona nee depois husik tiha ka ou governu toma sansaun ida nee mak tenke haree ida nee,” Jeneral fitun rua nee esplika.*

Reportajen: Emerenciana Pinto
Editor: Carme Ximenes

LEAVE A REPLY

Please enter your comment!
Please enter your name here