DILI- Lezada ho inisial LV tenke dada nia laen JL ba hatan iha tribunal, tanba arguidu halo agresaun hasoru lezada, bainhira lezada ba foti nia oan iha arguidu sira nia uma.
Husi arguidu nia hahalok nee Ministeriu Publiku akuza arguidu hanesan autor material ba krime violensia domestika ho forma ofensa integridade fisika simples neebe prevsitu iha artigu 145 kodigu penal no lei violensia domestika 07/2010.
Hatan ba akuzasaun nee, arguidu deklara katak, faktus balu loos no balu lalos.
Hau la baku lezada ida, tanba iha momentu neeba lezada ba foti labarik iha uma, nee mak hau tuir sai mai, hodi hadau fali labarik, maibe hau la baku lezada ida, ”deklara arguidu iha sala julgamentu.
Arguidu hatuan, agora sira hela separadu ona, arguidu mos arepende ba nia hahalok no promete sei la halo tan.
Iha fatin hanesan lezada katak, arguidu baku duni nia, bainhira lezada ba iha arguidu nia uma, hodi foti sira nia oan. Lezada deklara katak, agora dadaun sira hela fahe malu ona, no arguidu hela ho sira nia oan segundu, lezada hela ho sira nia oan primeru no terseru.
Audensia julgamentu nee, prezide husi juiz singular Antonio Do Carmo, Ministeriu Publiku reprezenta husi prokurador Nelson Carvalho, arguidu hetan asistensia legal husi defensor publiku. Notisia kompletu lee iha jornal STL edisaun Sabado, (28/04/2018). Terezinha De Deus